विमान निर्माता कम्पनी बोइङका प्रमुख कार्यकारी अधिकृत बर्खास्त

अमेरिकाको अग्रणी विमान निर्माता कम्पनी बोइङका प्रमुख कार्यकारी अधिकृत बर्खास्त भएका छन्।

कम्पनीप्रति जनविश्वास पुनःस्थापना गर्न भन्दै बोइङ कम्पनीले डेनिस मालनबर्गलाई पदबाट हटाएको हो।

इन्डोनेसिया र इथियोपियामा बोइङ कम्पनीको ७३७ म्याक्स मोडलका दुईवटा विमान दुर्घटना हुँदा ३४६ जनाको मृत्यु भएको थियो। त्यसपछि उक्त मोडलका विमानको उडान संसारभर रोकिएको थियो।

बीबीसीका अनुसार त्यसयता दबाब झेलिरहेका प्रमुख कार्यकारी अधिकृत मालनबर्गलाई बोइङले पदबाट बर्खास्त गरेको हो।

उनको ठाउँमा बोइङले कम्पनीका अध्यक्ष डेबिड काल्हुनलाई नियुक्ति गरेको छ। उनले जनवरी १३ तारिखदेखि नयाँ जिम्मेवारी सम्हाल्ने बीबीसीले जनाएको छ।

मालनबर्गले पहिलो पटक सन् १९८५ मा बोइङ कम्पनीमा जागिर पाएका थिए। सन् २०१५ मा प्रमुख कार्यकारी अधिकृतको जिम्मेवारी सम्हाल्नुअघि उनले बोइङको प्रतिरक्षा, अन्तरिक्ष तथा सुरक्षा विभागको नेतृत्व गरेका थिए।