युनिकोड
सरकारको नगद मौज्दात झण्डै तीन गुणाले बढेको छ।
चालू आर्थिक वर्षको आठौँ महिना फागुनसम्म राष्ट्र बैंकमा रहेका नेपाल सरकारका विभिन्न खातामा ३ खर्ब ७७ अर्ब ६१ करोड (प्रदेश सरकार तथा स्थानीय सरकारको खातामा रहेको रकमसमेत) नगद मौज्दात रहेको हो।
नेपाल राष्ट्र बैंकका अनुसार गत असार मसान्तमा यस्तो मौज्दात १ खर्ब ३७ अर्ब ७८ करोड रहेको थियो।
आठ महिनासम्ममा नेपाल सरकारको कुल खर्च ९ खर्ब २६ अर्ब ५९ करोड रहेको छ । समीक्षा
अवधिमा चालु खर्च ६४२ अर्ब १५ करोड, पँुजीगत खर्च ७८ अर्ब ४९ करोड र वित्तीय व्यवस्था खर्च रु.२०५ अर्ब ९५ करोड रहेको छ ।
समीक्षा अवधिमा नेपाल सरकारको कुल राजस्व परिचालन (प्रदेश सरकार तथा स्थानीय सरकारमा बाँडफाँट हुने रकमसमेत) ७४७ अर्ब २८ करोड पुगेको छ । यसअन्तर्गत कर राजस्व ६७६ अर्ब ५९ करोड र गैरकर राजस्व ७० अर्ब ६९ करोड परिचालन भएको छ।
त्यस्तै प्रदेश सरकारहरूको कुल खर्च ५८ अर्ब ७९ करोड र स्रोत परिचालन १ खर्ब २९ अर्ब ३२ करोड रहेको छ । प्रदेश सरकारहरूको कुल स्रोत परिचालनमा नेपाल सरकारले हस्तान्तरण गरेको अनुदान र विभाज्य कोषबाट बाँडफाँट हुने राजस्वसमेत गरी ९९ अर्ब ८४ करोड र प्रदेश सरकारहरूले परिचालन गरेको तथा अन्य स्रोतबाट प्राप्त राजस्व २९ अर्ब १ करोड रहेको छ ।
प्रतिक्रिया