श्रीलंकाको पानीमा माछा मार्ने १२ भारतीय समातिए

श्रीलंकाको जलसेनाले १२ भारतीयलाई पक्राउ गरेको छ।

आफ्नो जलक्षेत्रमा माछा मारिरहेको अवस्थामा उनीहरुलाई पक्राउ गरिएको श्रीलंकाली जलसेनाले बताएको छ।

श्रीलंकाको जाफ्नास्थित प्वइन्ट पेड्रो समुद्री किनाराबाट उनीहरुलाई डुङ्गासहित पक्राउ गरिएको जलसेनाका प्रवक्ता इन्डिका डि सिल्भाले जानकारी दिए। 

उत्तरी श्रीलंकाका बासिन्दाले भारतीय नागरिकहरु माछा मार्न आफ्नो क्षेत्रमा आएको भन्दै चिन्ता व्यक्त गर्दै आएका छन्।

यसले आफूहरुको रोजीरोटी खोसिने उनीहरुको भनाइ छ। यसअघि नै मुलुकको आर्थिक संकटको कारण समस्यामा रहेका उनीहरुलाई यसले थप मार थपिएको उनीहरुको भनाइ छ।

भारत र श्रीलंकाका तामिल समुदायका बीच माछा मार्ने क्षेत्राधिकारको विषयमा बेलाबेलामा विवाद हुँदै आएको छ।