वृद्धको हत्या आशंकामा एक महिलाको खोजी गर्दै हङकङ प्रहरी

अचेत अवस्थामा फेला परेका एक वृद्धको मृत्यु भएपछि हङकङ प्रहरीले सो घटनासँग सम्बन्धित एक महिलाको खोजी गरिरहेको छ। 

सोमबार दिउँसो मा ओन सानको पब्लिक हाउजिङबाट एम्बुलेन्स र प्रहरीलाई बोलाइएको थियो। छिमेकीले १९ औँ तलाको करिडोरमा अचेत अवस्थामा एक वृद्ध लडिरहेको फेला पारेपछि प्रहरीलाई खबर गरेका थिए। 

८० वर्षमाथिका देखिने ती वृद्धको अनुहार र हातमा चोट थियो।  

‘सुरुवाती परीक्षणमा हात र अनुहारमा चोट देखियो,’ प्रहरी प्रवक्ताले भनेका छन्, ‘नजिकैको सिँढीमा पनि रगतको दाग देखिएको छ। तर हतियार फेला परेको छैन।’

ती वृद्धलाई प्रिन्स अफ वेल्स अस्पताल पु¥याइएको थियो। जहाँ साढे २ बजे उनलाई डाक्टरले मृत घोषित गरेका थिए। 

यस घटनामा सम्बन्धित ५० वर्ष हाराहारीकी एक महिलाको खोजी भइरहेको प्रहरीले बताएको छ। 

यद्यपि मृतक र ती महिलाबीचको सम्बन्ध प्रहरीले सार्वजनिक गरेको छैन। एससीएमपी