बेइङजिङले ‘दोस्रो सरकार चलाएको’ आरोपको क्यारी लामले गरिन् खण्डन

हङकङकी प्रमुख कार्यकारी क्यारी लामले सत्ता सञ्चालनमा बेइजिङका अधिकारीहरुको प्रभाव देखिएको आरोपको खण्डन गरेकी छन्। 

हङकङस्थित बेइजिङको सम्पर्क कार्यालयले आम मानिससँग सम्पर्क स्थापित गर्ने विभिन्न कार्यक्रम राख्न थालेपछि कार्यालयका अधिकारीहरुले ‘दोस्रो सरकार’का रुपमा काम गर्न थालेको आरोप केहीले लगाएका थिए।

गत महिनायता सम्पर्क कार्यालयका अधिकारीहरुले एक दर्जनभन्दा बढी पटक हङकङका बासिन्दाहरुसँग प्रत्यक्ष सम्पर्क राखेका छन्। 

कार्यकारी प्रमुख लामले चिनियाँ अधिकारीहरुले हङकङबारे थप बुझ्न खोज्नु सकारात्मक भएको बताइन्। त्यसले असल नीति तयार गर्न सहयोग गर्ने उनको भनाइ थियो।

‘सम्पर्क कार्यालयका अधिकारीहरुले समस्या सही तरिकाले बुझे भने त्यसको उपयुक्त समाधान के हुन्छ भनेर केन्द्र सरकारलाई जानकारी गराउन सक्छन्,’ लामले भनिन्, ‘हामी सम्पर्क कार्यालयसहित अलगअलग मानिसहरुको विचार स्वीकार गर्छौँ। तर, ठोस काम गर्ने भनेको यहाँको स्थानीय प्रशासनले नै हो।’