हङकङ : सडकमा रुख ढल्दा ३ वटा गाडी किचिए

हङकङको काउलुनस्थित प्रिन्स एडवर्ड रोडमा रुख ढल्दा ३ वटा गाडी किचिएका छन्। बिहान ७:४८ बजे नाइट स्ट्रिटको चोकनजिकै मङकक बाउन्ड लेनमा १० मिटर रुख ढलेको थियो।

रुख ढलेपछि तीन घण्टाभन्दा बढी समयसम्म यातायात अवरुद्ध भएको थियो।

प्रहरी प्रवक्तालाई उद्धृत गर्दै साउथ चाइना मर्निङ पोस्टले जनाएअनुसार गुडिरहेका तीनवटा सवारीसाधन- ट्याक्सी, कार र स्कूल बसमाथि रुख बजारिएको थियो।

रुख बजारिएका सवारीसाधनमा सामान्य क्षति पुगेको छ भने मानिसलाई चोटपटक लागेको छैन।

ढलेको रुख अग्निनियन्त्रकको टोलीले पन्छाएको थियो। अवरुद्ध सडक बिहान ११:२० मा सुचारु भएको थियो।