युनिकोड
काठमाडौं उपत्यकामा आइतवार विशेष कार्यक्रमबीच योमरी पुन्ही पर्व मनाइएको छ।
राजधानीको वसन्तपुरमा नेवार समुदायहरुले प्रधानमन्त्री शेरबहादुर देउवासहितको उपस्थितिमा यो पर्व मनाएका हुन्।
नेवारी समुदायमा यस दिन योमरी (चामलको पीठोबाट बनाइएको र भित्र चाकु तथा तील राखेर विशेष प्रकारले पकाइएको रोटी) पकाएर खाने भएकाले योमरी पुन्ही भनिएको हो।
यस पूर्णिमालाई नेपालभाषामा थिल्ला पुन्ही पनि भनिन्छ। देशभरका नेपालभाषी योमरी बनाएर देवदेवीलाई चढाइसकेपछि प्रसादको रुपमा आफूहरु पनि खान्छन्। तैपनि यो पुन्ही एकदिनमात्र मनाइँदैन।
योमरी पुन्हीको भोलिपल्ट नेपालभाषीहरु आफ्ना नातागोता, छोरी, छोरीज्वाइँलाई घर बोलाएर योमरी सहितको भोज खुवाउने चलन छ। त्यसैले यो पर्व नेपालभाषी समुदायमा अत्यन्त महत्वपूर्ण मानिन्छ।
नेपाल भाषमा ‘यो’ भन्नाले मनपर्ने र ‘मरी’ भन्नाले रोटी भन्ने बुझिन्छ। यसरी सबैलाई मनपर्ने भएकोले यसलाई योमरी भनिएको हो।
आइतवार काठमाडौंसहित ललितपुर भक्तपुर र नेवार समुदायको बसोबास भएका सबै क्षेत्रमा यो पर्व मनाइएको छ।
काठमाडौं उपत्यकामा आज ज्यापु दिवश भनेर पनि मनाउने गरिन्छ।
प्रतिक्रिया