नेकपा (मसाल)का महामन्त्री मोहनविक्रम सिंहले एमाले अध्यक्ष केपी ओलीका गतिविधिले गम्भीर खालको प्रतिगमनको खतरा देखिएको आरोप लगाएका छन्।
प्रगतिशील पत्रकार संघ दाङले आज घोराहीमा आयोजना गरेको पत्रकार सम्मेलनमा महामन्त्री सिंहले ओलीका कारण अहिले देशमा गम्भीर प्रतिगमनको खतरा बढेको बताए।
‘मध्यावधि निर्वाचनको बहानामा संसद् भंग गर्ने देखावटी खेल मात्र हो। भित्री रहस्य हिन्दू राष्ट्र कायम गर्ने र राजतन्त्र पुनःस्थापना गर्ने हो,’ महामन्त्री सिंहले भने, ‘ओलीका गतिविधिहरु नेपाललाई धर्मनिरपेक्षताबाट हटाएर हिन्दू राष्ट्र कायम गर्ने र त्यसैको आडमा राजतन्त्र पुनःस्थापना गर्नेतर्फ केन्द्रित रहेको छ।’
महामन्त्री सिंहले प्रधानन्यायाधीश चोलेन्द्रशम्शेर जबरालाई हटाउन गठबन्धनभित्र विकल्पहरुको खोजी भइरहेको बताए। सर्वोच्च अदालतमा भएको आन्दोलनका कारण अहिले गम्भीर समस्या देखिएको भन्दै उनले आन्दोलनलाई लामो समयसम्म जान दिन नहुने बताए।
‘प्रधानन्यायाधीशका विरुद्धमा न्यायाधीशहरु र बारलगायतको आन्दोलन सही छ। न्यायिक सुधारका लागि प्रधानन्यायाधीशलाई हटाउनै पर्छ,’ उनले भने।
न्यायालयमा देखिएको समयमा समाधानका लागि गठबन्धनमा कुरा भइरहेको उनको भनाइ थियो। प्रधानन्यायाधीशलाई हटाउन कार्यपालिकासँग धेरै विकल्प नभएको र महाअभियोग मात्र विकल्प रहेको बताए। रासस
Shares
प्रतिक्रिया