शंकर पोखरेलको आरोप : सत्ता गठबन्धनले फेरि राजनीतिक अस्थिरता ल्याउँदैछन्

नेकपा एमालेका महासचिव शंकर पोखरेलले सत्ताधारी पाँच दलीय गठबन्धनलाई अस्थिरताका कारकको संज्ञा दिएका छन्। 

आगामी वैशाखमा गर्ने भनिएको स्थानीय तह निर्वाचनलाई ६ महिना धकेलेर पहिले संघीय र प्रदेश सभा निर्वाचन तयारीमा गठबन्धन लागेपछि पोखरेलले यस्तो बताएका हुन्। 

महासचिव पोखरेलले स्थानीय तहलाई फेरि पनि जनप्रतिनिधिविहीन बनाएर सत्तारुढ दलहरुले देशमा अस्थिरता पैदा गर्न खोजेको आरोप पनि लगाएका छन्। 

'बढीमा ६ महिना संकटकाल लगाउन सकिने व्यवस्थासमेतलाई ध्यानमा राखेर ढिलोमा ६ महिनाभित्र चुनाव गर्नैपर्ने संविधानको व्यवस्थालाई सत्तारुढले अपव्याख्या गरेका छन्', पोखरेलले भनेका छन्, 'बिनानाकुनै कारण स्थानीय तहलाई जनप्रतिनिधिविहीन बनाएर दुरुपयोग गर्नखोज्ने सत्ता गठवन्धनविरुद्धमा चुँ बोल्न नसक्नेहरु आफैँमा अस्थिरताका सर्जक हुन्।'

उनले सत्ता गठबन्धनले सरकार चलाए यताको ६ महिना पनि खेर फालेको बताएका छन्। 

उनले मन्त्रिपरिषद् विस्तारमै तीन महिना बिताएको गठबन्धनले थप तीन महिना एमाले सरकारका नियुक्ति खारेजमै बिताएको पनि आरोप लगाएका छन्। 

'तीन महिना मन्त्रिपरिषद् विस्तारमा र थप तीन महिना पुराना नियुक्ति खारेज गर्ने काममै लागेर नयाँ नियुक्ति गर्ने कुरामै व्यतित भयो गठवन्धन सरकारको ६ महिना', उनले भने, 'कामका लागि त गठबन्धन होइन, बलियो पार्टीको सरकार चाहिन्छ नेपालमा।'