उपप्रधान एवं गृहमन्त्री नारायणकाजी श्रेष्ठले शान्ति प्रक्रियाका बाँकी काम तत्काल सक्नुपर्ने बताएका छन्।
प्रेस सेन्टर नेपाल उपत्यका प्रदेश समितिको साधारण सभालाई शनिबार अनामनगरमा सम्बोधन गर्दै उनले शान्ति प्रक्रिया सम्पन्न नगरे थप समस्या बढ्ने बताए।
‘शान्ति प्रक्रियाका बाँकी काम अहिले हामीले हरहालतमा पूरा गर्नुपर्छ’, उनले भने, ‘यसलाई पूरा हुन नदिन निकै कोसिस भइरहेका छन्।’
मुलुक शान्ति प्रक्रियामा आएपछि अन्य सबै काम भए पनि शान्ति प्रक्रियाकै काम सम्पन्न नहुँदा समस्या बल्झिने उनले बताए।
‘संविधान जारी भएको ७ वर्ष बितिसक्यो, शान्ति प्रक्रियामा आएकै दशक नाघ्यो, अब धेरै लम्ब्याउनु हुँदैन’, श्रेष्ठले थपे ।
अर्को एक प्रसंगमा उनले अर्थतन्त्रलाई चलायमान गराएर अघि बढ्न सरकार प्रयासरत रहेको दाबी गरे।
‘बाहिर हल्ला गरेजस्तो गम्भीर संकटमा छैन तर, समस्या देखिएको छ’, उनले भने, ‘यो सुधार हुन्छ, केही कार्यक्रम अघि बढेका छन्।’
Shares
प्रतिक्रिया