युनिकोड
सरकार गठन भएको तीन महिनामा ६ पटक मन्त्रिपरिषद् पुर्नगठन र हेरफेर भए पनि पूर्ण पाउन सकेको छैन। मंगलबार छैटौँ पटकमा दुई मन्त्री थपिएका छन्।
गत फागुन २१ गते भएको प्रतिनिधि निर्वाचनबाट राष्ट्रिय स्वतन्त्र पार्टी (रास्वपा)ले झण्डै दुई तिहाई सिट जितेको थियो। त्यसपछि गत चैत १३ मा रास्वपा वरिष्ठ नेता वालेन्द्र शाहको नेतृत्वमा सरकार गठन भएको थियो।
त्यसयता ६ पटक सरकार पुनर्गठन र हेरफेर भएको छ। दोस्रो पटक गत चैत २४ मा, तेस्रो पटक गत चैत २७ मा, चौथो पटक गत वैशाख ९ र पाँचौँ पटक गत वैशाख ३१ मा मन्त्रिपरिषद् हेरफेर भएको थियो। आज छैटौँ पटक मन्त्री थपिएका हुन्।
मंगलबार सुधन गुरुङ र महावीर पुन मन्त्री नियुक्त भएका छन्। गुरुङलाई गृह र पुनलाई विज्ञान, प्रविधि तथा नवप्रवर्तन मन्त्रालयको जिम्मेवारी दिइएको छ।
तीन महिनामा ६ पटक हेरफेर हुँदा १८ सदस्यीय मन्त्रिपरिषद्ले पूर्णता पाएको छैन। अझै पनि रक्षामन्त्री नियुक्त हुन बाँकी छ। अहिले प्रधानमन्त्री शाहले रक्षा मन्त्रालय आफूसँगै राखेका छन्।
यसअघि २२ मन्त्रालय थिए। शाह नेतृत्वको सरकारले मन्त्रालयको संख्या घटाएर १८ मा झारेको हो। प्रधानमन्त्री शाहसहित अहिले १७ मन्त्री पुगेका छन्।
प्रतिक्रिया