मोरङमा दाउरा लिन जंगल गएकी महिलाको हात्तीको आक्रमणबाट मृत्यु

मोरङमा जंगली हात्तीको आक्रमणबाट एक महिलाको मृत्यु भएको छ। 

सुन्दरहरैँचा-५ डिपुमा हात्तीले आक्रमण गर्दा स्थानीय ६० वर्षीया चन्द्रकला लिम्बूको मृत्यु भएको जिल्ला प्रहरी कार्यालय मोरङका डीएसपी बेदप्रकाश जोशीले जानकारी दिए। 

जोरीकाअनुसार चन्द्रकला सोमबार दिउँसो दाउरा लिन नजिकैको जंगलमा गएकी थिइन्। साँझसम्म घर नफर्कीएपछि उनको खोजी सुरु भएको थियो। 

खोजी गर्ने क्रममा मंगलबार बिहान स्थानीयले चन्दकलालाई जंगलको खोल्सीमा मृत अवस्थामा फेला पारेका हुन्। 

बिहान स्थानीय चन्द्रकलालाई खोज्दै जंगलमा जाँदा हात्ती पनि नजिकै देखिएको प्रहरीको भनाई छ। चन्द्रकलाको शव पोस्टमार्टमका लागि अस्पताल लगिएको छ। 

यस अघि यही पुस ५ गते सोही सुन्दरहरैँचा-७ कि ४० वर्षीया गंगामाया मगरलाई पनि जंगली हात्तीले आक्रमण गर्दा मृत्यु भएको थियो।