पत्रकार शर्मामाथि कुटपिट गरिएकोप्रति महासंघको आपत्ति

नेपाल पत्रकार महासंघले बाँके शाखाका कार्यसमिति सदस्य संगीन शर्मालाई कुटपिट गरिएको घटनाप्रति ध्यााकर्षण भएको जनाएको छ।

शर्मालाई सत्तारुढ नेपाल कम्युनिष्ट पार्टी (नेकपा) का ५ नम्बर प्रदेश समिति सदस्य पुजन विश्वकर्माले गुण्डा लगाएर कुटपिट गरी घाइते बनाएको महासंघले आरोप लगाएको छ।

महासंघका अनुसार पुस ६ गते बाँकेको कोहलपुरस्थित युगयान दैनिकको कार्यालय अगाडि बोलाएर विश्वकर्माले पत्रकार शर्मालाई गुण्डा लगाई कुटपिट गराएका थिए।

कुनै पनि बहानामा पत्रकारमाथि गुण्डा लगाई कुटपिट गरिएको यो घटना आफैंमा निन्दनीय र आपत्तिजनक छ भन्दै दोषीमाथि कानुनी कारबाही गर्न र पत्रकार सुरक्षामा गम्भीर बन्न महासंघले स्थानीय प्रशासनसँग माग गरेको छ।