युनिकोड
नेपाल वायुसेवा निगमका न्यारोबडी जहाजले हङकङका लागि बिहीबार र शुक्रबार २/२ उडान गर्ने भएका छन् ।
हङकङस्थित नेपालको वाणिज्य दूतावाससँग सहकार्य गरी हङकङ सरकारले नेपालमा फसेका हङकङ नागरिक फिर्ता लैजाने भएपछि निगमका जहाजले उडान गर्ने भएका हुन्।
‘आगामी ४ र ५ तारिखमा दुई/दुई न्यारोबडी हङकङ उडान गर्न बुकिङ भएका छन्’, नेपाल वायुसेवा निगमकी प्रवक्ता अर्चना खड्काले भनिन्, ‘हङकङमा बसोबास गर्ने नेपाली फर्किन लागेका हुन्।’
एउटा न्यारोबडीमा बच्चाबाहेक १ सय ५८ जना नागरिक यात्रा गर्न सक्छन्। चार न्यारोबडीमार्फत ६ सय ३२ जना यो हप्ता नै हङकङ फर्किन सक्नेछन्।
यसअघि सोमबार राति निगमको दुई न्यारोबडी र एक वाइडबडी विमानमा ५ सय ८० बढी नागरिक फर्किसकेका छन्। उनीहरुले न्यारोबडीमा ८५ हजार र वाइडबडीमा १ लाख भाडा तिरी फर्किएका हुन्।
विद्यालय, विश्वविद्यालय, व्यापार/व्यवसाय र रोजगारीका लागि महंगो चार्टर्ड जहाजमा उनीहरु फर्किएका छन्। उनीहरु हङकङ फर्किएर १४ दिन क्वारेन्टिनमा बसी आफ्नो घर तथा काममा फर्किन पाउनेछन्।
प्रतिक्रिया