केजरीवालको घरबाहिर फोहोर फ्याँकेपछि पक्राउ परिन् मालीवाल

दिल्लीमा आम आदमी पार्टीका राष्ट्रिय संयोजक अरविन्द केजरीवालको घर बाहिर फोहोर फ्याँकेपछि राज्यसभा सांसद तथा दिल्ली महिला आयोगकी पूर्वअध्यक्ष स्वाती मालीवाललाई प्रहरीले पक्रेको छ। 

भारतीय सञ्चारमाध्यमका अनुसार उनले दिल्लीमा राम्रो सरसफाइ भइरहेको भनेर आम आदमी पार्टीले गरेको दाबीको विरोधमा त्यसो गरेकी थिइन्।

त्यही क्रममा मालीवाललाई प्रहरीले नियन्त्रणमा लिएको समाचार एजेन्सी एएनआईले जनाएको छ।

यसपछि मालीवालले पत्रकारहरूसँग कुरा गर्दै भनिन्, ‘पूरै दिल्ली फोहोरको थुप्रो बनेको छ। म यहाँ अरविन्द केजरीवालजीलाई भेटेर दिल्लीले आफ्नो फोहोर कहाँ फाल्ने भनेर सोध्न आएको हुँ।’

उनले थपिन्, ‘आफूलाई सुधार्नुहोस् नत्र जनताले तपाईंलाई सुधार्नेछन्। म न यिनका गुन्डा डराउँछु न प्रहरीबाट नै।’