युनिकोड
भारत सरकारले बहुप्रतीक्षित केदारनाथ ‘रोपवे’ परियोजनालाई स्वीकृति दिएको छ।
भारतीय सञ्चारमाध्यमका अनुसार प्रधानमन्त्री नरेन्द्र मोदीको अध्यक्षतामा रहेको आर्थिक मामिलासम्बन्धी मन्त्रिपरिषद् समिति (सीसीईए) ले सोनप्रयागदेखि केदारनाथसम्मको १२.९ किलोमिटर लामो रोपवे परियोजना अनुमोदन गरेको हो।
यससँगै अब ‘रोपवे’मार्फत केदारनाथ ३६ मिनेटमै पुग्न सकिने भएको छ। हाल पैदल वा खच्चडबाट जाँदा केदारनाथ पुग्न ८/९ घण्टा लाग्छ।
यस परियोजनाबाट वार्षिक हजारौँ तीर्थयात्रीले लाभ पाउने अपेक्षा गरिएको छ।
भारत सरकारले जारी गरेको विज्ञप्तिअनुसार केदारनाथ रोपवे परियोजना डिजाइन, निर्माण, वित्त, सञ्चालन तथा हस्तान्तरण मोडलमा विकास गरिनेछ।
परियोजनाको लागत ४,०८१.२८ करोड रुपैयाँ रहेको बताइएको छ।
केदारनाथ रोपवे समुद्री सतहबाट ३,५८३ मिटर उचाइमा रहनेछ। यो विश्वकै सबैभन्दा लामो रोपवेमध्ये एक हुनेछ।
केदारनाथ रोपवेले घण्टामा ३,६०० यात्रु ओसारपसार गर्न सक्ने भारतीय सञ्चारमाध्यमले उल्लेख गरेका छन्।
प्रतिक्रिया