युनिकोड
अस्ट्रेलियाको बोन्डी बिच भन्ने स्थानमा आइतबार भएको अन्धाधुन्ध गोली प्रहारमा मारिनेको संख्या १५ पुगेको छ।
न्यु साउथ वेल्सका प्रिमियर क्रिस मिन्सले गोली लागेर १० वर्षीया बालिकासहित १५ जनाको मृत्यु भएको पुष्टि गरेका छन्। मृतकमा एक आक्रमणकारी पनि छन्।
प्रहरी आयुक्त माल लानियोनले आक्रमणकारीहरू बुबा र छोरा भएको बताए। बुबा साजिद अक्रम ५० वर्ष र छोरा नविद अक्रम २४ वर्षका छन्।
आठ बुँदामा अहिलेसम्म थाहा भएका कुरा:
-न्यु साउथ वेल्सका प्रिमियर क्रिस मिन्सले १० वर्षीया बालिकासहित १५ जनाको मृत्यु भएको पुष्टि गरेका छन्। मृतकमा एक आक्रमणकारी पनि छन्।
-प्रहरी आयुक्त माल लानियनले दुई बन्दुकधारी ५० वर्षीय बुबा र उनका २४ वर्षीय छोरा रहेको बताएका छन्। जसमध्ये प्रहरीको गोली बाबुको मृत्यु भइसकेको छ भने छोराको अवस्था गम्भीर छ।
-घटनास्थलमा रहेका प्रहरी अधिकारीहरूसहित ४२ जनालाई अस्पताल लगिएको छ।
-प्रहरीले ५० वर्षाका ती आक्रमणकारीसँग बन्दुकको इजाजतपत्र रहेको पाइएको बताएको छ। उनको नाममा दर्ता छवटा हतियार घटनास्थल बोन्डी बिचबाट बरामद भएका छन्।
-घटनास्थलमा दुई सक्रिय विस्फोटक पदार्थ फेला परेका थिए, जसलाई प्रहरीले सुरक्षित रूपमा निष्क्रिय पारेको छ।
-अधिकारीहरूले पश्चिमी सिड्नीको केम्प्सी र बोनिरिग क्षेत्रमा रातभर खोजतलास गरेका छन्।
-प्रहरीले सिड्नीमा यहुदी समुदायलाई थप सुरक्षा र सहयोग प्रदान गर्न ३२८ प्रहरी अधिकारी खटाइएको बताएको छ।
-प्रधानमन्त्री एन्थोनी अल्बानिजले आक्रमणको जवाफ दिन आवश्यक सबै स्रोत प्रयोग गरिने बताएका छन्।उनले अस्ट्रेलियाली समाजबाट यहुदीविरोधी भावनालाई जरैदेखि उखेल्ने प्रतिबद्धता पनि व्यक्त गरेका छन्।
प्रतिक्रिया