युनिकोड
सोमबार साँझ जम्मु-कश्मीरको उधमपुरमा सुरक्षाकर्मी र सशस्त्र समूहबीच भिडन्त हुँदा एक प्रहरीको मृत्यु भएको छ।
भारतीय सञ्चारमाध्यमका अनुसार गोली हानाहान हुँदा जम्मु-कश्मीर प्रहरीको विशेष अपरेसन समूह (एसओजी) का सिपाही अमजद पठान गम्भीर घाइते भएका थिए। उनको उपचारका क्रममा निधन भएको हो।
जैस-ए-मोहम्मद (जेएम) का एक लडाकुलाई पनि गोली लागेको छ। तर उनको मृत्युको रिपोर्ट गरिएको छैन।
सुरक्षा बलले उधमपुरको माजलता क्षेत्रको सोन गाउँनजिकै सोमबार साँझ ६ बजे सशस्त्र समूहका तीन जना रहेको जानकारी प्राप्त भएको थियो। यसपछि जम्मु-कश्मीर प्रहरी, सेना र सीआरपीएफले खोजी अभियान सुरु गरे।
त्यस क्रममा दुवै तर्फबाट गोली हानाहान भएको हो।
प्रारम्भिक भिडन्तमा सशस्त्र समूहका एक जना पनि घाइते भएको आशंका गरिएको छ। सोमबार रात परेपछि रोकिएको अपरेसन आज (मंगलबार) बिहान पुनः सुरु हुने बताइएको छ।
प्रतिक्रिया