नेतन्याहुको दाबी: गाजापट्टीको ६० प्रतिशत भूभाग हाम्रो कब्जामा

इजरायली प्रधानमन्त्री बेन्जामिन नेतान्याहुले आफ्नो सेनाले गाजा पट्टीको ६० प्रतिशत भूभाग नियन्त्रणमा लिएको बताएका छन्।

कमजोर युद्धविरामलाई अगाडि बढाउने र युद्धलाई स्थायी रूपमा अन्त्य गर्ने प्रयास रोकिएको र गाजा दैनिक हिंसाको चपेटामा परेको समयमा उनको यस्तो टिप्पणी आएको हो।

जेरुसेलम दिवसको अवसरमा शुक्रबार आयोजित एक कार्यक्रममा नेतन्याहुले भने, 'बितेका दुई वर्षमा हामीले हाम्रा जनतामा, हाम्रो राज्यमा, हाम्रो सेनामा र हाम्रो विरासतमा कति शक्तिशाली शक्तिहरू समाहित छन् भन्ने सम्पूर्ण विश्वलाई पुष्टि गरेर देखाएका छौँ।'

'हामीले हाम्रा सबै बन्धकहरूलाई घर फिर्ता ल्यायौँ', उनले थपे, 'हामीलाई गाजाबाट फर्किन दबाब दिने व्यक्तिहरू इजरायलमा नै थिए तर लहड र डरमा हामी फिर्ता भएनौँ। आज हामी गाजापट्टीको ६० प्रतिशत भूमिमा नियन्त्रण राख्न सफल बनेका छौँ। अब के गर्ने सोच्न सक्नेछौँ।' 

अमेरिकी मध्यस्थतामा अक्टोबरदेखि इजरायल र हमासबिच भएको युद्धविरामका सर्तअनुसार इजरायली सेना गाजाबाट ‘एलो लाइन’मा फर्कनुपर्ने थियो, प्यालेस्टाइन क्षेत्रको ५० प्रतिशतभन्दा बढी नियन्त्रण छाड्नुपर्थ्यो।

नेतन्याहुको टिप्पणी हालैका हप्ताहरूमा इजरायली सेना नयाँ तथाकथित ‘ओरेन्ज लाइन’मा जाँदै छ भन्ने मिडिया रिपोर्टपछि सेनाले आफ्नो पदचिह्न विस्तार गरिरहेको छ भन्ने पहिलो आधिकारिक संकेत हो।

गाजामा युद्ध सुरु गर्न बाध्य पारेको सन् २०२३ अक्टोबर ७ मा इजरायलमाथि भएको आक्रमणपछि युद्धविरामको पहिलो चरणमा इजरायलले हिरासतमा लिएका प्यालेस्टिनीहरूको बदलामा हमासको नियन्त्रणमा रहेका सम्पूर्ण बन्धकहरूलाई फिर्ता गरिएको थियो।

दोस्रो चरणमा हमासको निशस्त्रीकरण र गाजा पट्टीबाट इजरायली सेनाको क्रमिक फिर्तीको मुद्दा छन्।

'हमास र मध्यस्थकर्ताहरूबीच जारी वार्तामा ती लक्ष्यहरूतर्फ प्रगति रोकिएको छ', इजरायली मिडियाले रिपोर्ट गरेको छ, 'यदि हमासले निशस्त्रीकरण गर्न अस्वीकार गर्यो भने, सेनाले गाजामा लडाइँ पुनः सुरु गर्ने तयारी गरिरहेको छ।'