हङकङको निर्माण क्षेत्रमा कामदार मृत्यु प्रकरण : पक्राउ परेका पूर्वप्रबन्धकको सुनुवाइ सर्‍यो

दुई वर्षअघि निर्माण क्षेत्रमा टावर क्रेन भत्किँदा तीन कामदारको मृत्यु प्रकरणमा पक्राउ परेका तत्कालीन परियोजना प्रबन्धकको सुनुवाइ सरेको छ।

हाल बेरोजगार रहेका ३५ वर्षीय कान हो दुर्घटनाको समयमा एग्रेसिभ कन्स्ट्रक्सन कम्पनीमा परियोजना प्रबन्धक रहेको प्रहरीले जनाएको छ।

उनी परियोजना प्रबन्धकको जिम्मेवारीमा रहँदा घटना घटेको भन्दै प्रहरीले पक्राउ गरेर मुद्दा चलाएको हो।

हाल हिरासतमा राखिएका उनलाई अदालतले ३० जुलाईका लागि सुनुवाइ तोकेको छ। उनको क्वान तोङ अदालतमा मुद्दा चलिरहेको छ।

एग्रेसिभ कन्स्ट्रक्सन कम्पनीको साउमाउ पिङस्थित एन्डरसन रोडमा रहेको हाउजिङ सोसाइटीको निर्माण स्थलमा ७ सेप्टेम्बर २०२२ मा दुर्घटना भएको थियो।

अस्थायी कार्यालयको रूपमा प्रयोग भइरहेको कन्टेनरमा ६५ टनको टावर क्रेन खस्दा तीन कामदारको मृत्यु हुनुका साथै अन्य ६ जना घाइते भएका थिए।

• हङकङको निर्माण क्षेत्रमा ३ जनाको मृत्यु प्रकरण : तत्कालीन प्रबन्धक पक्राउ, हत्याको आरोप लाग्न सक्ने