हङकङमा जारी टी१ संकेत बेलुका ६ बजेसम्म लागु रहने, टी३ को सम्भावना कायमै

हङकङमा जारी टी१ संकेत शुक्रबार साँझ ६ बजेसम्म लागु रहने अब्जर्भेटरीले बताएको छ। तीव्र उष्णकटिबन्धीय आँधी ट्रामीले आज दिनको अधिकांश समय सहरबाट ६ सय किलोमिटर आसपासको दूरी कायम गर्ने अनुमान गरिएको छ। टी१ संकेत शुक्रबार बिहान १:४० मा जारी गरिएको हो।

बिहान पौने ११ बजे, ट्रामी हङकङको ६५० किलोमिटर दक्षिणपूर्वमा रहेको अनुमान गरिएको छ। यो बिहान १० बजे सहरबाट ७१० किलोमिटर दक्षिणपूर्वमा रहेको अनुमान गरिएको थियो। ट्रामी दक्षिण चीन सागरको मध्य र उत्तरी भागमा करिब १८ किलोमिटर प्रतिघण्टाको रफ्तारमा पश्चिम सर्ने अनुमान छ।

ट्रामी र उत्तरपूर्वी मनसुनको संयुक्त प्रभावमा स्थानीय हावा कहिलेकाहीँ अपतटीय र उच्च जमिनमा बलियो हुने अब्जर्भेटरीले जनाएको छ। यद्यपि, हङकङमा प्रचलित हावा मुख्यतया उत्तरी हुने भएकाले भू-भाग आश्रय प्रभावका कारण स्थानीय हावा आज दिउँसो खासै बलियो नहुने अनुमान गरिएको छ।

अहिलेलाई बेलुका ६ बजेसम्म टी१ संकेत जारी रहने बताएको अब्जर्भेटरीले ट्रामी र हङकङको दूरी तथा स्थानीय वायुको प्रभावका आधारमा टी३ संकेत जारी गर्नु पर्ने/नपर्ने आवश्यकताको मूल्यांकन गरिने जनाएको छ।

‘स्ट्यान्डबाइ संकेत नम्बर १ कम्तीमा बेलुका ६ बजेसम्म लागु रहनेछ। बलियो हावा संकेत नम्बर ३ जारी गर्ने/नगर्ने आवश्यकता ट्रामी र हङकङबीचको दूरी र स्थानीय वायुको शक्तिमा निर्भर हुनेछ,’ अब्जर्भेटरीले भनेको छ।

अब्जर्भेटरीका अनुसार ट्रामी आज बिहान स्थिर रूपमा पश्चिमतर्फ सरेको छ र यसले दिउँसोको अधिकांश समय हङकङबाट करिब ६ सय किलोमिटरको दूरी कायम गर्नेछ। यसपछि बिस्तारै हाइनान टापुतर्फ सर्नेछ। यसका साथै, स्थानीय हावा आइतबारपछि कमजोर हुनेछ।

यद्यपि, यसको पछिल्लो अवस्था र तीव्रतामा अनिश्चितता छ। यो हाइनान टापुको दक्षिणी समुद्रमा रहन सक्छ वा अर्को हप्ताको सुरुमा फेरि दक्षिण चीन सागरको मध्य र उत्तरी भागमा पूर्वतिर सर्न सक्छ। यद्यपि, ट्रामी त्यतिबेलासम्म कमजोर हुने र हङकङबाट केही दूरी कायम गर्ने अपेक्षा गरिएको छ।