लिभरपुलले हङकङमा प्रि-सिजन खेल खेल्ने, काइताक रंगशालामा होला त ‘मार्की गेम’?

लिभरपुल र अन्य दुई अंग्रेजी प्रिमियर लिगका प्रि-सिजन खेल हङकङमा पनि हुने स्रोतले जानकारी दिएको छ।

स्रोतका अनुसार, तीनै प्रिमियर लिग टोलीहरू एकै समयमा सहरमा हुनेछन् वा छैनन् भन्ने कुरा यकिन नभए पनि कम्तीमा एउटा खेल चाहिँ हुनेछ।

कार्यक्रमसँग जानकार तर योजनाहरू सार्वजनिक गर्न अधिकार नभएका कारण परिचय गोप्य राख्न अनुरोध गर्दै स्रोतले भन्यो, ‘खेलको मिति र स्थान तय भइसकेको छैन।’

यद्यपि, ट्याटलर एसिया र स्थानीय प्रमोटरहरूले जुलाईमा काइताक स्पोर्ट्स पार्कमा खेलको योजना बनाइरहेका छन् भन्ने कुरा बाहिर आएपछि प्रतिद्वन्द्वी पक्षहरू ठूला-नामका युरोपेली क्लबहरूलाई हङकङमा आकर्षित गर्न लागिपरेका छन्।

प्रमुख प्रवर्धक पल कामले गतहप्ता भनेका थिए- उनीसँग ‘धेरै चाँडै’ ग्रीष्मकालीन खेलकुदको बारेमा समाचार हुनेछ र काइताकको ५० हजार सिट क्षमता भएको रंगशालामा प्रमुख मार्की खेलहरू आयोजना गर्ने व्यवस्था ‘९० प्रतिशत सकिएको’ छ।

कामले यो पनि पुष्टि गरेका थिए कि स्थानीय क्लबले एउटा खेल खेल्नेछ वा चार टोलीको प्रतियोगितामा संलग्न हुनेछ।

लिभरपुलले पनि काइताक रंगशालामा खेल खेल्न सहमति जनाइसकेको स्रोतले बताएको छ। ५० हजार सिट क्षमताको यो रंगशाला १ मार्चमा उद्‌घाटन हुँदैछ।

गएको मंगलबार राति परीक्षण खेलपश्चात्‌ संस्कृति, खेलकुद तथा पर्यटन सचिव रोसाना लले रंगशालाको उद्‌घाटन मिति घोषणा गरेकी थिइन्। (एससीएमपी)

• हङकङको काइताक रंगशाला उद्‌घाटन मिति तोकियो, परीक्षण खेलमा ५० हजार दर्शक