हङकङ : को हुन् यी मानिस जसले शक्तिशाली आँधीसँग पौँठेजोरी खेले?

भर्खर शक्तिशाली आँधी रगासा खेपेको हङकङमा यतिखेर एउटा तस्बिर भाइरल भइरहेको छ। साउथ चाइना मर्निङ पोस्टका फोटोग्राफर एल्सन लीले खिचेको उक्त तस्बिर जति सामान्य छ त्यत्तिकै खतरनाक पनि छ।

किनकि त्यो समय हङकङमा टाइफुन चेतावनी संकेत १० जारी थियो। सुपर टाइफुन रगासा हङकङको सबैभन्दा नजिकको बिन्दुमा थियो। फोटोग्राफर ली चेङक्वान ओ प्रोमेनेडमा पुग्दा छालहरू तटमा ठोकिइरहेका थिए। त्यही बेला उनले एक अनौठो दृश्य देखे।

चेङक्वान ओ क्रस बे ब्रिजको समुद्रतिर फर्केको बेन्चमा एक मानिस बसिरहेका थिए। उनले यो देख्दा बुधबार बिहान साढे ६ बजेको समय थियो। उच्चस्तरको चेतावनी संकेत १० जारी भएको यस समयमा एक त सर्वसाधारणलाई घरबाट बाहिर निस्कन नै अनुमति हुँदैन त्यसपछि छालकै सम्मुख मस्तसँग बसिरहेको देखेका उनलाई अचम्म र अनौठो लाग्नु स्वाभाविक नै भयो।

अचम्मित र डरलाग्दो यो दृश्यलाई उनले झटपट कैद गरे र उसलाई बोलाउने कोसिस गरे। जुन समयमा, १७ मिटर (५६ फिट) अग्लो चेङक्वान ओ क्रस बे लिंकको दुई तिहाइ उचाइसम्म पुग्ने छालहरू तटमा ठोकिइरहेका थिए। नियतिलाई हेरिरहनु बाहेक उनीसँग अरू विकल्प रहेन।