नेपाली कांग्रेस प्रदेश २ को नेतृत्व चयनका लागि मतदान सुरु भएको छ।
६७ पदका लागि बिहान ९ बजे सुरु मतदान दिउँसो ३ बजेसम्म चल्ने निर्वाचन समितिका सदस्य विनय सिंहले नेपालखबरलाई जानकारी दिए।
जनकपुरधामस्थित गोपाल धर्मशालामा जारी कांग्रेसको प्रथम अधिवेशनमा ७२ पदका लागि १८० जनाले उम्मेदवारी दिएका छन्। तर यीमध्ये ५ सदस्य निर्विरोध चयन भइसकेका छन्।
बाँकी ६७ पदका लागि मतदान भइरहेकाे हो।
प्रदेश २ का आठ जिल्लाबाट झण्डै २ हजार मतदाता निर्वाचनमा सहभागी छन्।
मतदानका लागि चारवटा बुथको व्यवस्था गरिएको निर्वाचन समिति सदस्य सिंहले बताए।
मतदान बिहीबार बिहान ८ बजे सुरु गर्ने भनिए पनि मतपत्र छपाइमा ढिलाइ भएकाले सुरुवात केही ढिला भएकाे हाे।
मतदानमा ढिलाइका विषयमा बुधबार सभापतिका उम्मेदवारद्वय कृष्ण यादव र रामसरोज यादव पक्षबीच कुटाकुटसमेत भएको थियो। सोही कारण आज बिहान ८ बजेसम्मका लागि मतदान स्थगन गरिएकाे थियो।
नयाँ नेतृत्व चयनका लागि सभापति शेरबहादुर देउवा पक्षबाट कृष्ण र विमलेन्द्र निधि पक्षबाट रामसरोज प्यानलसहित चुनावी मैदानमा छन्। रामसरोजलाई शेखर कोइराला पक्षको पनि समर्थन छ।
कृष्ण यादव रौतहट जिल्लाका पार्टी सभापति हुन् भने रामसरोज प्रदेश २ का कांग्रेस संसदीय दलका नेता तथा भौतिक पूर्वाधार विकास मन्त्री हुन्।
रामसरोज निधि र शेखर कोइरा पक्षका संयुक्त उम्मेदवार रहेकाले दुई उम्मेदवारबीच कडा प्रतिस्पर्धा हुने देखिएको छ।
कृष्ण यादवको प्यानलबाट उपसभापतिमा प्रदेश २ का महिला तथा बालबालिकामन्त्री वीरेन्द्र सिंह (सर्लाही) र बाराका चन्द्रशेखर यादवले उम्मेदवारी दिएका छन् भने महामन्त्रीमा सिरहाका उपेन्द्र यादव र पर्साका वृहस्पतिकुमार श्रेष्ठ उम्मेदवार बनेका छन्।
यस्तै सहमहामन्त्रीमा बाराका जयनारायण यादव, सप्तरीका परशुराम चौधरी र सप्तरीकै रीता यादवले उम्मेदवारी दिएका छन्।
यस्तै रामसरोजको प्यानलबाट उपसभापतिमा रौतहटका धनलाल ठोकर र सर्लाहीका विनोद खनाल छन् भने महामन्त्रीमा सिरहाका नरेश यादव र सर्लाहीका हरेश महतोले उम्मेदवारी दिएका छन्।
यस्तै सहमहामन्त्रीमा पर्साका अरविन्द अमात्य, महोत्तरीको बलवा नगरपालिकाका नगरप्रमुख विनोद यादव र बाराकी निर्मला सुवेदी समेतले रामसरोजको प्यानलबाट उम्मेदवारी दिएका छन्।
Shares
प्रतिक्रिया