स्थानीय तह निर्वाचनमा गठबन्धन गरेर चुनाव लडेका नेपाली कांग्रेस, नेकपा माओवादी केन्द्र र नेकपा एकीकृत समाजवादीबीचको गठबन्धन जिल्ला समन्वय समिति निर्वाचनमा भत्किएको छ।
जिसस कैलालीमा नागरिक उन्मुक्ति पार्टी, माओवादी केन्द्र र नेकपा एमाले मिलेर चुनावमा भाग लिने सहमति भएसँगै पाँच दलीय गठबन्धन भत्किएकाे हाे।
कैलालीमा तीन दल मिलेपछि कांग्रेस र समाजवादी एक्लिएका छन्।
१३ स्थानीय तह रहेको कैलालीमा जिससको निर्वाचनका लागि २६ मत छ। जितका लागि १४ मत आवश्यक पर्छ।
बिहीबार नागरिक उन्मुक्ति पार्टी, एमाले र माओवादीबीच सहमति भएसँगै उनीहरुको मत १६ पुग्ने भएको छ।
कैलालीमा रेशम चौधरीको नागरिक उन्मुक्ति पार्टीको मत ७, एमालेको ५ र माओवादीको ४ मत छ।
३० गते हुने तय भएको जिसस कैलालीको निर्वाचनमा यी तीन दलले अध्यक्षसहित दुई सदस्य नागरिक उन्मुक्ति पार्टीलाई, उपाध्यक्षसहित २ सदस्य एमालेलाई र ४ सदस्य माओवादी केन्द्रलाई दिने सहमति समेत गरेका छन्।
बैठकमा नागरिक उन्मुक्ति पार्टीका केन्द्रीय सदस्य दामोदर पण्डित, माओवादी केन्द्रका जिल्ला इन्चार्ज हरि ज्ञवाली तथा एमाले उपाध्यक्ष दुर्गा जोशीलगायतको उपस्थिति थियो।
उक्त सहमतिसँगै जिल्लामा ७ मत रहेको कांग्रेस र १ मत रहेको एकीकृत समाजवादी भने बाहिरै रहने भएका छन्।
Shares
प्रतिक्रिया