उपराष्ट्रपति नन्दबहादुर पुनले सरकारी निवास छाडेका छन्। पुन बिहीबार (२ चैत) लैनचौरस्थित सरकारी निवासबाट चन्द्रागिरि नगरपालिका दहचोकमा बनेको निजी निवासमा सरेका हुन्।
बिहीबार दिउँसो साढे १२ बजे पुन निजी निवास सरेका हुन्। पुनका लागि दहचोकमा निजी निवास निर्माण भइसकेको छ।
‘नयाँ आउने उपराष्ट्रपतिका लागि कार्यालय निवास, सरसफाइ र सजावट गर्न सजिलो होस भनेर पहिल्यै निवास छाडिएको हो,’ पुनका सचिवालय सदस्य दीपेश पुनले नेपालखबरसँग भने।
नयाँ उपराष्ट्रपतिको लागि भोलि शुक्रबार (३ चैत) निर्वाचन हुँदैछ। उपराष्ट्रपतिको निर्वाचनअघि नै पुनले सरकारी निवास छाडेका हुन्।
उपराष्ट्रपतिका लागि नेपाली कांग्रेस, माओवादी केन्द्र, नेकपा एकीकृत समाजवादी, नेपाल समाजवादी पार्टी लगायतका दलको गठबन्धनबाट जनता समाजवादी पार्टी (जसपा) संसदीय दलका नेता रामसहायप्रसाद यादव उम्मेदवार छन्।
नेकपा एमालेले अष्टलक्ष्मी शाक्यलाई उम्मेदवार बनाएको छ भने जनमत पार्टीले समानुपातिक सांसद ममता झालाई उपराष्ट्रपति उम्मेदवार बनाएको छ।
उपराष्ट्रपति चुनावमा संघ र प्रदेशका ८ सय ८१ सांसदले मतदान गर्नेछन्।
फागुन २५ गते राष्ट्रपति निर्वाचित भएका रामचन्द्र पौडेललाई फागुन २९ गते शीतलनिवासमा स्वागत गरिएको थियो।
निवर्तमान राष्ट्रपति विद्यादेवी भण्डारी पनि सोही दिन निजी निवास सरेकी थिइन्।
Shares
प्रतिक्रिया