युनिकोड
प्रधानमन्त्री केपी शर्मा ओली आज जनकपुर जाँदैछन्।
जनकपुरधामस्थित राजर्षिजनक विश्वविद्यालयको पहिलो दीक्षान्त समारोहमा सहभागी हुन प्रधानमन्त्री एवम् कुलपति ओली जनकपुरधाम जान लागेका उनको सचिवालयले जनाएको छ।
‘मंगलबार बिहान ११ बजे प्रधानमन्त्री जनकपुर जाने कार्यक्रम छ,’ सचिवालयलका एक सदस्यले नेपालखबरसँग भने, ‘जनकपुरधामस्थित महेन्द्रनारायण निधि मिथिला संस्कृति केन्द्रमा आयोजना हुने विश्वविद्यालयको दिक्षान्त समारोहमा प्रधानमन्त्री ओलीले स्नातक तथा स्नातकोत्तर तह उत्तीर्ण विद्यार्थीलाई दीक्षित गर्ने कार्यक्रम तय भएको छ।’
विश्वविद्यालयको कार्यक्रममा सहभागी भएर प्रधानमन्त्री ओली आजै काठमाडौँ फर्किने कार्यक्रम छ।
विश्वविद्यालय स्रोतका अनुसार आज तीन ब्याचमा स्नातक तथा स्नातकोत्तर तह उत्तीर्ण गरेका ११५ जना विद्यार्थी दीक्षित हुनेछन्।
संघीय सरकारअन्तर्गत सञ्चालनमा रहेको राजर्षिजनक विश्वविद्यालयमा हाल चार सङ्कायका १३ वटा शैक्षिक कार्यक्रम सञ्चालनमा छन्। जसमा एमफिल, एमबीए, बीबीए, बीडीबीएम, बीई–सिभिल, बीआईटी, बीसीए, बीएस्सी–सीएसआईटी, बीपीएच, बीएस्सी–एमएलटी, बीएस्सी–एजी, बीए–एलएलबी र बीजेएमसी कार्यक्रम समावेश छन्।
२०७४ साल कात्तिक १२ गते स्थापना भएको यो विश्वविद्यालय मातहत पाँचवटा आंगिक क्याम्पस सञ्चालनमा छन् भने हालसम्म ६८ वटा निजी क्याम्पसले पनि यो विश्वविद्यालयबाट सम्बन्धन लिएका छन्।
प्रतिक्रिया