युनिकोड
नेकपा (माओवादी केन्द्र) का सांसद माधव सापकोटाले संविधान संशोधन, सुशासन र स्थिरताको प्रतिबद्धता गर्दै गठन भएको वर्तमान सरकार पूर्णतः असफल भएको आरोप लगाएका छन्।
प्रतिनिधि सभाको बुधबारको बैठकमा बोल्दै सांसद सापकोटाले यस्तो आरोप लगाएका हुन्। उनले सरकार गठनको उद्देश्यअनुसार संविधान संशोधन प्रक्रिया नथालेको, समन्वय नगरेको र सुशासन प्रवद्र्धनमा असफल भएको आरोप लगाए।
उनले पोखराको लिचिबारी जग्गा प्रकणमा मधेसी मूलका सोझा मन्त्रीलाई पदमुक्त गरिएको तर मुख्य आरोपीलाई संरक्षण गर्ने काम भइरहेको पनि आरोप लगाए।
उनले भने, ‘संविधान संशोधन, मुलुकमा सुशासन कायम र स्थिरता दिन्छौं भनेर गठन भएको सरकार कहाँ छ भनेर लिचिबारीसम्म आईपुग्दा देखियो। मधेसमूलबाट आएको एउटा सोझो मन्त्रीलाई छपक्क ढालियो। चाणक्यले भनेजस्तो काटिने त अन्ततः सोझै रुख हो। अर्को एउटा बाङ्गो रुख त बाङ्गै छ। त्यो रुखलाई त राम्रो मलजल र राम्ररी संरक्षण भएको होला।’
सरकारले गर्ने सकारात्मक काममा सहयोग गर्न प्रतिपक्षी दल सधैं तयार रहेपनि सरकार भ्रष्टाचार र अनियमितता गर्नमै व्यस्त रहेको उनको आरोप छ।
उनले भने, ‘संविधान संशोधन, स्थिरता र सुशासनको नारा दिएको सरकारले आजको दिनसम्म पनि कसैलाई एक मिनेट बोलाएर छलफल नगर्ने? अनि अहिले आएर लोकप्रियतावादीहरुलाई गाली गरेर के उपलब्धी हुन्छ? राम्रो काम गरौँ न। त्यसको लागि कस्तो कागजमा हस्ताक्षर गर्नुपर्ने हो, प्रतिपक्ष तयार छ। तर काण्डैकाण्डले हुँदैन।’
उनले लोकप्रियतावादको विरोध गरेर मात्र केही उपलब्धि नहुने भन्दै सरकारलाई व्यवहारिक सुधार र परिणाममुखी कार्यमा ध्यान दिन आग्रह गरे।
प्रतिक्रिया