युनिकोड
नेकपा एमालेका अध्यक्ष केपी शर्मा ओलीलाई आगामी निर्वाचनका लागि झापा क्षेत्र नम्बर ५ बाट उम्मेदवारको लागि पार्टीले सर्वसम्मत सिफारिस गरेको छ।
आगामी फागुन २१ गते हुने निर्वाचनको लागि नेकपा एमाले झापा निर्वाचन क्षेत्र नम्बर ५ को आज बसेको बैठकले अध्यक्ष ओलीको नाम एकल रूपमा सिफारिस गर्ने निर्णय गरेको हो।
एमाले झापाका सचिव तुलसी कार्कीका अनुसार, बैठकले प्रत्यक्ष तर्फको उम्मेदवारका लागि ओलीको मात्र नाम सिफारिस गरेको छ। अध्यक्ष ओली यसअघि वि.सं. २०७४ र २०७९ मा सम्पन्न दुवै आम निर्वाचनमा सोही क्षेत्रबाट भारी मतान्तरले विजयी भएका थिए।
आफ्नो निर्वाचन क्षेत्रमा बलियो जनमत र पार्टीभित्र निर्विकल्प नेतृत्वका रूपमा रहेकाले यसपटक पनि उनको नाममा सर्वसम्मत निर्णय भएको उनले बताए।
निर्वाचनको मिति नजिकिँदै गर्दा एमालेले जिल्लाभर उम्मेदवार छनोटको प्रक्रियालाई तीव्रता दिएको छ।
प्रतिक्रिया