उदय शमसेरको दाबी: विशेष महाधिवेशनले एकताको सन्देश दिन्छ

नेपाली कांग्रेसका नेता उदयशमशेर राणाले पार्टीका कुनैपनि नेता कार्यकर्ताले पार्टी विभाजन होस् भन्ने नचाहेको बताएका छन्।

शुक्रबार सञ्चारकर्मीहरूसँग कुरा गर्दै नेता राणाले यस्तो बताएका हुन्। उनले आसन्न प्रतिनिधि सभा निर्वाचन नेपाली कांग्रेसका लागि ठूलो चुनौती रहेको उल्लेख गर्दै उक्त चुनौतीको सामना गर्न पार्टीभित्र आन्तरिक एकता अपरिहार्य रहेको बताए।

उनले पार्टीका नेता कार्यकर्तालाई उग्र नभई संयमित हुन आग्रह गर्दै पार्टीभित्रको समस्या समाधान गर्न मध्यमार्गी बाटो अपनाउन समेत अपिल गरे। नेता राणाले विशेष महाधिवेशनलाई सफल बनाउन पार्टीका सबै तहका नेता तथा कार्यकर्तालाई सहयोग गर्न अपिल पनि गरे। 

उनले भने, ‘पार्टी विभाजित हुने कुरामा म विश्वास गर्दिनँ। कुनैपनि कांग्रेसका नेता कार्यकर्ताले पनि कांग्रेस फुटोस् भन्ने चाहेका छैनन्। तर चुनाव अगाडि हामी सबै एउटै ठाउँमा उभिएर यो जटिल अवस्थाको सामना गर्नुपर्ने अवस्था छ। प्रतिनिधि सभा चुनाव नेपाली कांग्रेसका निम्ति एकदमै चुनौतीको रुपमा आएको छ। यसलाई फेस गर्नको लागि सबै साथीहरू एकै ठाउँमा उभिएर चुनावमा जानुपर्छ भन्ने हाम्रो धारणा हो।’

आइतबारदेखि हुने विशेष महाधिवेशनले एकताको सन्देश दिने जिकिर पनि गरे ।