युनिकोड
यातायात व्यवस्था कार्यालय हेटौंडाका अधिकृत अमृत भेटुवाल र बिचौलिया खगेन्द्र पौडेलविरुद्ध अख्तियार दुरुपयोग अनुसन्धान आयोगले आज बिहीबार विशेष अदालत, काठमाडौंमा आरोपपत्र दायर गरेको छ। सवारी सरूवा सहमति गर्ने प्रयोजनका लागि सेवाग्राहीसँग ११ हजार ५ सय रुपैयाँ घुस लिएको अभियोगमा उनीहरूविरुद्ध मुद्दा चलाइएको हो।
अख्तियारका प्रवक्ता सुरेश न्यौपानेका अनुसार अधिकृत भेटुवाल र लेखापढी व्यवसायी पौडेलको आपसी मिलेमतो तथा योजनामा सेवाग्राहीसँग घुस माग गरी बार्गेनिङ गरिएको अनुसन्धानबाट खुलेको छ। ११ हजार ५ सय रुपैयाँ घुस लिइसकेको अवस्थामा अख्तियारको हेटौंडास्थित कार्यालयबाट खटिएको टोलीले उनीहरू दुवै जनालाई नियन्त्रणमा लिएको थियो।
आयोगले अधिकृत अमृत भेटुवाललाई भ्रष्टाचार निवारण ऐन, २०५९ को "दफा ३ को उपदफा (१)" बमोजिमको कसुरमा ११ हजार ५ सय रुपैयाँ बिगो कायम गरेको छ। निजलाई सोही ऐनको "दफा ३ को उपदफा (१) को देहाय (क)" बमोजिम कैद र बिगो बमोजिम जरिवाना सजाय गर्न मागदाबी लिइएको छ।
त्यसैगरी, बिचौलियाको भूमिका निर्वाह गर्ने खगेन्द्र पौडेललाई भ्रष्टाचार निवारण ऐन, २०५९ को दफा ३ को उपदफा (२) बमोजिमको कसुरमा सोही ऐनको दफा ३ को उपदफा (२) ले निर्देश गरेबमोजिम बिगो कायम गरी दफा ३ को उपदफा (१) को देहाय (क) बमोजिम कैद र बिगो बमोजिम जरिवाना सजायको माग गरिएको छ। दुवै प्रतिवादीको पूर्वयोजना र सहमतिअनुसारै घुस लेनदेन भएको पुष्टि भएपछि आयोगले आज विशेष अदालतमा आरोपपत्र दर्ता गराएको हो।
प्रतिक्रिया