भारतमा रहेको आईफोन कारखाना आफ्नो ‘निगरानी’मा राख्ने एप्पलको निर्णय

अमेरिकी प्रविधि कम्पनी एप्पलको आईफोन उत्पादन गर्दै आएको भारतस्थित फक्सकोनको कारखाना अब एप्पलको निगरानीमा रहने भएकाे छ।

ठूलो मात्रामा खाद्यान्नमा विषादी पाइएको र मजदुरको जीवनमाथि खेलबाड भएको भन्दै यसअघि भारतको तामिलनाडुमा रहेको उक्त कारखानाको विरोधमा प्रदर्शन भएको थियो। 

त्यसपछि फक्सकोन र एप्पल दुवै कम्पनीले उक्त कारखानाको विषयमा अनुसन्धान गरेका थिए। अनुसन्धानको क्रममा उक्त प्लान्टमा मजदुरको आराम र खानाको मापदण्ड पालना नगरिएको पाइएको थियो।

यससँगै कम्पनीले अब उक्त प्लान्टलाई आफ्नो निगरानीमा राख्ने बताएको हो । साथै समस्या समाधान गर्न ‘सुधारको कामलाई’ द्रूत गतिमा कार्यान्वयन गर्ने एप्पलले बताएको छ। 

यसअघि फक्सकनको कारखानामा काम गर्ने करिब २५० महिलालाई यसै महिना खाद्य विषाक्तताको उपचार गरिएको थियो र उनीहरूमध्ये १५९ जना अस्पताल भर्ना भएका थिए।

यो घटनापछि गत डिसेम्बर १८ देखि चेन्नई नजिकैको श्रीपेरुम्बुदुरस्थित कारखाना कम्पनीले बन्द गरेको थियो । 

कारखानाले लगभग १७ हजार मानिसहरूलाई काममा लगाएको छ ।

यसले भारतीय बजार र निर्यातका साथै अन्य उपकरणहरूका लागि आइफोन बनाउँछ । कारखानामा सुधारको काम चलिरहँदा त्यहाँ रहेका सबै कर्मचारीको भुक्तानी भने जारी रहनेछ।