युनिकोड
पार्किङमा राखिएको स्कुटरको डिक्की फुटाई चोरी गर्ने २ जनालाई काठमाडौँ प्रहरीले पक्राउ गरेको छ।
प्रहरीका अनुसार भदौ १५ गते दिउँसो करिब १२ बजे काठमाडौँ महानगरपालिका-३० डिल्लीबजारस्थित कारागार कार्यालयको कम्पाउन्डमा पार्किङ गरिएको बा.७६ प ७२५२ नम्बरको स्कुटरको डिक्की फुटाएर चोरी गर्ने कार्यमा संलग्न रहेका २ जनालाई चोरीका सामानसहित नियन्त्रणमा लिइएको हो।
पक्राउ पर्नेहरूमा सोलुखुम्बु दुधकुण्ड नगरपालिका-८ घर भई काठमाडौँको महाराजगञ्ज बस्ने ३४ वर्षीय सबिनकुमार श्रेष्ठ र काभ्रेपलाञ्चोक रोशी गाउँपालिका-३ घर भई काठमाडौँ असन बस्ने ३१ वर्षीय पाल्साङ दोर्जे रहेका छन्।
पक्राउ परेकासँग प्रहरीले १२ हजार रुपैयाँ र कालो रंगको पर्ससहित विभिन्न एटीएम कार्ड, सवारी चालक अनुमति पत्र, विभिन्न कम्पनीका २ थान मोबाइल फोनलगायतका सामान बरामद गरेको जनाएको छ।
उनीहरूलाई काठमाडौँ जिल्ला अदालतबाट ५ दिनको म्याद थप अनुमति लिइ थप अनुसन्धान भइरहेको जिल्ला प्रहरी परिसर काठमाडौँका प्रवक्ता प्रहरी उपरीक्षक अपीलराज बोहराले जानकारी दिए।
प्रतिक्रिया