पश्चिमी र स्थानीय वायुको प्रभाव : यी स्थानमा पानी तथा हिउँ पर्ने प्रक्षेपण

हाल नेपालमा पश्चिमी वायुका साथै स्थानीय वायुको आंशिक प्रभाव रहेको मौसम पूर्वानुमान महााशाखाले जनाएको छ। यतिबेला (सोमबार बिहान) सुदूरपश्चिम प्रदेशलगायत देशका हिमाली क्षेत्रको आकाशमा साधारणतया बादल लागेको छ भने बाँकी आकाशमा आंशिक बादल लागेको छ। गण्डकी प्रदेशका एक-दुई स्थानमा मेघगर्जन/चट्याङसहित हल्का वर्षा/हिमपात भइरहेको छ।

मौसम महाशाखाले आज बिहान ८ बजे जारी गरेको प्रक्षेपणअनुसार दिउँसो देशका पहाडी र हिमाली क्षेत्रको आकाशमा साधारणतया बादल लाग्नेछ भने तराईको आकाशमा आंशिक बादल लाग्नेछ। सुदूरपश्चिम र कर्णाली प्रदेशका पहाडी र हिमाली भूभागका केही स्थान तथा बाँकी पहाडी र हिमाली भूभागका थोरै स्थानमा मेघगर्जन/चट्याङसहित हल्का वर्षा/हिमपात हुने सम्भावना छ। 

राति देशका पहाडी र हिमाली भेगको आकाशमा साधारणतया बादल लाग्नेछ भने तराईको आकाशमा आंशिक बादल लाग्नेछ। कोसी, गण्डकी र कर्णाली प्रदेशका हिमाली तथा पहाडी भूभागका थोरै स्थान तथा बाँकी हिमाली तथा पहाडी भूभागका एक-दुई स्थानमा मेघगर्जन/चट्याङसहित हल्का वर्षा/हिमपात हुने सम्भावना रहेको मौसम महाशाखाले जनाएको छ। 

यसैबिच आज काठमाडौँ उपत्यकाको आकाशमा पनि आंशिक बादल लाग्ने र साँझपख हल्का वर्षा हुने सम्भावना रहेको मौसमविद्ले बताएका छन्। तर आज काठमाडौँ उपत्यकामा पानी पर्ने सम्भावना निकै कम रहेको बताइएको छ।