युनिकोड
आगामी ३/४ दिनभित्र मनसुन देशभर फैलिने सम्भावना रहेको मौसम पूर्वानुमान महाशाखाले जनाएको छ।
मौसम महाशाखाले आज बिहान ८ बजे जारी गरेको बुलेटिनअनुसार ३/४ दिनमा देशका बाँकी स्थान गण्डकी र लुम्बिनी प्रदेशका बाँकी भाग, कर्णाली र सुदूरपश्चिम प्रदेशका सम्पूर्ण क्षेत्रमा मनसुन विस्तार हुने सम्भावना देखिएको हो।
यस वर्ष सरदर मिति (जुन १३ तारिख) भन्दा ६ दिन ढिला यही असार ५ गते (जुन १९ तारिख) कोसी प्रदेशबाट प्रवेश गरेको मनसुन असार ८ देखि लुम्बिनी प्रदेशसम्म फैलिएको थियो।
मौसम महाशाखाका अनुसार हाल मनसुन हाल कोसी, मधेस र बागमती प्रदेशका सबै भाग, गण्डकी प्रदेशका केही स्थान र लुम्बिनी प्रदेशको पूर्वी क्षेत्रका थोरै ठाउँसम्म फैलिएको छ। देशका बाँकी स्थानमा भने पश्चिमी वायु र स्थानीय वायुको आंशिक प्रभाव छ।
मौसमविद्का अनुसार मनसुन कमजोर अवस्थामा रहेकाले खासै पानी पर्न नसकेको हो।
आज कहाँ, कस्तो छ त वर्षाको सम्भावना?
मौसम महाशाखाका अनुसार आज दिउँसो कोसी, बागमती र गण्डकी प्रदेशका हिमाली र पहाडी भूभागका केही स्थान, लुम्बिनी, कर्णाली र सुदूरपश्चिम प्रदेशका हिमाली र पहाडी भूभागका थोरै स्थानमा मध्यमसम्म वर्षा/हिमपातको सम्भावना छ। कोसी प्रदेशका तराई भूभाग तथा मधेस प्रदेशका थोरै स्थान, बागमती र गण्डकी प्रदेशको तराईका एक-दुई स्थानमा मेघगर्जन/चट्याङसहित मध्यमसम्म वर्षाको सम्भावना छ। लुम्बिनी र सुदूरपश्चिम प्रदेशका तराई भूभागका थोरै स्थानमा भने तातो लहर हुने सम्भावना छ।
यस्तै राति कोसी, बागमती र गण्डकी प्रदेशको हिमाली र पहाडी भूभागका केही स्थान तथा लुम्बिनी, कर्णाली र सुदूरपश्चिम प्रदेशका हिमाली र पहाडी भूभागका थोरै स्थानमा मेघगर्जन/चट्याङसहित मध्यमसम्म वर्षा/हिमपातको सम्भावना छ। कोसी प्रदेशका तराई भूभाग तथा मधेस प्रदेशका केही स्थान, बागमती र गण्डकी प्रदेशका तराईका थोरै स्थान तथा लुम्बिनी प्रदेशका तराई भूभागका एक-दुई स्थानमा मेघगर्जन/चट्याङसहित मध्यमसम्म वर्षाको सम्भावना छ। कोसी प्रदेशका पहाडी र तराई भूभागका एक-दुई स्थानमा भारी वर्षाको समेत सम्भावना छ।
काठमाडौँमा खण्डित वर्षाको सम्भावना
आज काठमाडौँ उपत्यकामा पनि हल्कादेखि मध्यमसम्म वर्षा हुने सम्भावना देखिएको मौसमविद्ले बताएका छन्।
मौसम पूर्वानुमान महाशाखाका मौसमविद् बिनु महर्जनका अनुसार काठमाडौँ उपत्यकामा अपराह्न वा साँझपख पानी पर्ने सम्भावना छ।
‘अहिले बिहान काठमाडौँ उपत्यकाको आकाशमा बादल लागेको छ’, उनले शनिबार बिहान ८:२० बजेतिर नेपालखबरसँग भनिन्, ‘तर यो बादल बिस्तारै घट्ने र घाम देखिने सम्भावना छ। तर दिउँसोपछि फेरि बादल बढ्ने र हल्कादेखि मध्यमसम्म वर्षा हुने सम्भावना देखिएको छ। वर्षा खण्डित (एक ठाउँमा पानी पर्ने तर अर्को ठाउँमा नपर्ने) रूपमा हुने देखिन्छ।’
हल्का, मध्यम, भारी र धेरै भारी वर्षा भनेको के हो?
मौसमविद्का अनुसार २४ घण्टाभित्र १० मिलिमिटरभन्दा कम पानी पर्यो भने हल्का वर्षा, १० मिलिमिटरभन्दा धेरै तर ५० मिलिमिटरभन्दा कम पानी पर्यो भने मध्यम वर्षा तथा ५० मिलिमिटरभन्दा धेरै तर १०० मिलिमिटरभन्दा कम वर्षा भयो भने भारी वर्षा भएको भनिन्छ।
यस्तै २४ घण्टामा १०० मिलिमिटरभन्दा धेरै तर २०० मिलिमिटरभन्दा कम पानी परेमा धेरै भारी तथा २०० मिलिमिटर भन्दा धेरै वर्षा भएमा अति भारी वर्षा भएको भनिन्छ।
एक-दुई स्थान, केही स्थान, धेरै स्थान र अधिकांश स्थानमा वर्षा भन्नाले के बुझिन्छ?
मौसमविद्का अनुसार एक-दुई स्थानमा वर्षा हुने सम्भावना भन्नाले १० प्रतिशतभन्दा कम भूभागमा पानी पर्छ भनिएको हो।
अनि १० देखि ३० प्रतिशत भूभागमा पानी पर्ने सम्भावना हुँदा ‘थोरै स्थान’मा वर्षा हुन्छ भनिन्छ।
यसैगरी ३० देखि ५० प्रतिशत भूभागमा पानी पर्ने सम्भावना हुँदा ‘केही स्थान’मा तथा ५० देखि ८० प्रतिशत भूभागमा वर्षा हुने सम्भावना हुँदा ‘धेरै स्थान’मा वर्षा हुने सम्भावना छ भनिन्छ।
अनि ८० प्रतिशतभन्दा बढी भूभागमा पानी पर्ने सम्भावना हुँदा मौसमविद्ले ‘अधिकांश स्थान’मा वर्षा हुने सम्भावना छ भन्छन्।
मौसमका लागि प्रयोग हुने शब्दावलीबारे विस्तृत जानकारीका लागि तलको तालिका हेर्नुहोस्
यो पनि : आज पश्चिमका यी जिल्लामा बाढीको जोखिम
प्रतिक्रिया