युनिकोड
कोशीटप्पु वन्यजन्तु आरक्ष क्षेत्रबाट निस्केको जङ्गली हात्तीको आक्रमणबाट सप्तरीमा एक वृद्धको मृत्यु भएको छ।
मृत्यु हुनेमा कञ्चनरुप नगरपालिका–५ निवासी ६५ वर्षीय नारायण खङ्ग रहेका इलाका प्रहरी कार्यालय कञ्चनपुरले जनाएको छ।
घरदेखि करिब एक किलोमिटर टाढा रहेको खेतमा काटिएको धान रुँग्न बसेका बेला बिहीबार राति उनलाई जङ्गली हात्तीले आक्रमण गरेको थियो।
बिहीबार बिहान उनको शव हात्तीले किचेर मृत्यु भएको अवस्थामा फेला परेको इलाका प्रहरी कार्यालय कञ्चनपुरका प्रमुख डीएसपी माधवप्रसाद काफ्लेले बताए ।
राति खेतको झुप्रोमा उनी बसिरहेको बेला हात्तीले आक्रमण गरेको थियो। हात्तीले झुप्रो भत्काउन थालेपछि उनी त्यहाँबाट भागेका थिए।
झुप्रोदेखि केही पर उनको शव फेला परेको प्रहरीले जनाएको छ। हात्तीले झुप्रो भत्काउँदै लखेटेर उनीमाथि आक्रमण गरेको मृतककी पत्नी जानकीदेवीले बताएकी छन्।
हात्ती आक्रमणबाट त्रसित र पीडितले नियन्त्रणको माग गर्दै त्यस क्षेत्रका बासिन्दाले पटकपटक स्थानीय प्रशासन र आरक्ष प्रशासनलाई ज्ञापनपत्र बुझाए पनि ठोस पहल हुन नसकेको स्थानीयको गुनासो छ।
प्रतिक्रिया