लागूऔषध बोकेको आशंकामा काठमाडौबाट दुई जना पक्राउ

राजधानीको नागार्जुन नगरपालिका– ६ शरणपुर चोक नजिक कैलास बैकुण्ठ खाजा तथा सेकुवा होटलबाट अवैध लागूऔषध बोकेको आशंकामा दुई जनालाई प्रहरीले पक्राउ गरेको छ।
 
प्रहरीले जनाए अनुसार पोलेन जस्तो देखिने वस्तु ७३ किलोग्राम र गाँजा जस्तो देखिने वस्तु २ किलो ५ सय ग्रामसहित २ जनालाई बिहीबार बिहान प्रहरीले पक्राउ गरेको हो।

पक्राउ पर्नेहरूमा होटलका संचालक काठमाडौं महानगरपालिका–१५ बस्ने मकवानपुर घर भएका २७ वर्षीय देवराज घिसिङ र मकवानपुर कैलाश गाउँपालिका–२ घर भएका ४३ वर्षीय अष्तमराज घिसिङ रहेका छन्। 

प्रहरी वृत्त स्वयम्भूबाट खटिएको प्रहरीले होटल तलासी गर्दा उक्त लागूऔषध फेला पारी दुवै जनालाई पक्राउ गरेको हो । 
यसैगरी बाँके कोहलपुर नगरपालिका–१४ ढोरपुर बस्ने ४२ वर्षीय हरिराम चमारलाई अवैध लागूऔषध ब्राउनसुगर जस्तो देखिने पदार्थ २ सय ६० मिलिग्राम सहित बिहीबार दिउँसो प्रहरीले पक्राउ गरेको छ।

 
अस्थायी प्रहरी चौकी हवल्दारपुर र लागूऔषध नियन्त्रण ब्यूरो शाखा कार्यालय नेपालगंजबाट खटिएको प्रहरीले चमारलाई उनकै घर नजिकैबाट उक्त पदार्थ सहित फेला पारी पक्राउ गरेको हो।यसबारे थप अनुसन्धान भइरहेको प्रहरीले जनाएको छ।