बेलायती राजधानीले युरोपको अत्यन्त मूल्यवान् सेयरबजारको स्थान गुमाएको छ । बेलायती अर्थतन्त्र खराब अवस्थामा गुज्रिएसँगै लण्डनले उक्त स्थान गुमाएको बीबीसीले जनाएको छ ।
उक्त स्थान अब फ्रान्सले लिएको छ । फ्रेन्च विलासी सामानको माग बढ्नथाल्दा र मुद्रा चलायमान हुँदा कम्पनीहरुको सेयर मूल्य ह्वात्तै बढेको छ । सन् २००३ मा रेकर्ड राख्न थालेयता पेरिसले लण्डनलाई ओभरट्र्याक गरेको यो पहिलोपटक भएको ब्लुमबर्गले जनाएको छ । महंगी बढेसँगै बेलायत यसै वर्ष मन्दीमा जानसक्ने देखिएको छ ।
बेलायती सेयरको कुल मूल्य अहिले २८ खर्ब २१ अर्ब अमेरिकी डलर वरिपरि रहेको छ भने फ्रान्सको कुल सेयर मूल्य २८ खर्ब २३ अर्ब अमेरिकी डलर रहेको ब्लुमबर्गले हिसाबकिताब निकालेको छ ।
मध्यमखालका कम्पनीहरु सूचीकृत भएको लण्डनको एफटीएसई २५० सेयर इन्डेक्स गत वर्षयता १७ प्रतिशतभन्दा धेरैले घटेको छ भने उपभोक्ता र व्यवसायले बढ्दो महंगी र उच्च ब्याजदरसामु संघर्ष गरिरहेका छन् । यसका बाबजुद ठूला कम्पनीहरु सूचीकृत एफटीएसई १०० इन्डेक्स भने स्थिर रहेको छ ।
ब्लुमबर्गका अनुसार फ्रान्सको विलासी सामान उत्पादकले देशको सीएसी ४० इन्डेक्सको कुल मूल्य बढाउन मद्दत गरेको छ ।
Shares
प्रतिक्रिया