पाँचतारेमा एकछत्र राज गरेको नेपाल रिक्रियसनले सरकारलाई तिरेन ९० करोड

नेपालको मुख्य पाँचतारे होटलमा राज गरेको नेपाल रिक्रियसन सेन्टर प्रालिले सञ्चालन गरेको क्यासिनोले नेपाल सरकारलाई करोडौँ तिर्न बाँकी रहेको देखिएको छ।

सोल्टी होटल, अन्न्पूर्ण होटल, हायात होटल, एभरेष्ट होटललगायत क्यासिनो सञ्चालन गरेबापतको रोयल्टी तिर्न बाँकी रहेको हो।

नेपाल रिक्रियसन सेन्टर प्रालिमार्फत ती होटलहरुमा विभिन्न चरणमा क्यासिनो सञ्चालन भए पनि कम्पनीले सरकारलाई रोयल्टीबापतको पैसा नतिरेको हो।

सरकारले उसलाई सोमबार सार्वजनिक सूचना नै जारी गरी पैसा तिर्न ताकेता गरेको छ। कम्पनीले करिब १० वर्षदेखिको कुल ९० करोड ५० लाख रुपैयाँ रोयल्टी तिर्न बाँकी छ।

नेपाल रिक्रियसन सेन्टर प्रालिले होटल सोल्टी क्राउन प्लाजामा रहेको क्यासिनो नेपाल, होटल अन्नपूर्णमा क्यासिनो अन्ना, होटल हायात रिजेन्सीमा क्यासिनो तारा र होटल एभरेष्टमा रहेको क्यासिनो एभरेष्ट गरी चारवटा क्यासिनो सञ्चालन गरेको थियो।

उपत्यकामा सञ्चालित टप पाँचतारे होटलमा क्यासिनो सञ्चालन गरेर अधिक पैसा कमाए पनि रोयल्टीबापतको पैसा बाँकी राखेको हो।

महालेखा नियन्त्रकको कुमारी चोक तथा केन्द्रीय तहसिल कार्यालयले उपलब्ध गराएको तथ्याङ्कअनुसार विगतको कारोबारमा सरकारलाई भुक्तानी दिन बाँकी विभिन्न कम्पनी तथा व्यक्तिहरुमा सबैभन्दा अधिक नेपाल रिक्रियसन सेन्टर प्रालिको छ।

यसका सञ्चालक दुई जना भारतीय, एक जना अमेरिकन र तीन जना नेपाली नागरिक छन्। जसमा राकेश बाधवा र शालिनी बाधवा भारतीय नागरिक हुन् भने रिचर्ड डोयल टटल अमेरिकी नागरिक हुन्।

त्यस्तै शान्ति चड्डा र तुलाराम भट्ट नेपाली नागरिक हुन्। यिनीहरुको सेयर स्वामित्व रहेको नेपाल रिक्रियसन सेन्टर प्रालिले सरकारलाई बुझाउनुपर्ने रोयल्टी नबुझाएको केन्द्रीय तहसिल कार्यालयले जनाएको छ। कार्यालयले उनीहरुको तीनपुस्ते विवरण सोमबार सार्वजनिक गरेको छ।

यस कम्पनीका अलावा अरु ६२ कम्पनी तथा व्यक्तिहरुले विभिन्न प्रकृतिका पैसा नेपाल सरकारलाई तिर्न बाँकी देखिएको छ।

त्यसमा धेरै ठेकेदार कम्पनी सञ्चालक, क्यासिनो सञ्चालकहरु छन्। केन्द्रीय तहसिल कार्यालयका अनुसार ठेकेदार कम्पनीले सुरुमा मोबिलाइजेसनमार्फतको खर्च लिने र पछि ठेक्का तोडिएपछि उक्त पैसा फिर्ता नगर्ने प्रवृत्ति धेरै देखिएको छ।

अन्य रोयल्टी तिर्नुपर्ने प्रकृतिका क्यासिनो तथा मनोरञ्जन र सेवा प्रदान गर्ने प्रकृतिका कम्पनी सञ्चालनहरुले पनि पैसा नतिरेको जनाएको छ।

कसले कति तिर्न बाँकी?