नेपालसँग १४ महिनाको वस्तु तथा सेवा आयात धान्न सकिने विदेशी मुद्रा

सरकारले २०७९ मा आयातमा कडाइ सुरु गरेसँगै बढेको वैदेशिक मुद्रा सञ्चिति साढे १४ महिनालाई पुग्ने देखिएको छ।

चालू आर्थिक वर्षको १० महिनासम्म १७.४ महिनाको वस्तु आयात र १४.६ महिनाको वस्तु तथा सेवा आयात धान्न पर्याप्त रहेको राष्ट्र बैंकले उल्लेख गरेको हो। 

आर्थिक वर्ष २०८०/८१ को दश महिनाको आयातलाई आधार मान्दा बैंकिङ्ग क्षेत्रसँग रहेको विदेशी विनिमय सञ्चिति १५.१ महिनाको वस्तु आयात र १२.६ महिनाको वस्तु तथा सेवा आयात धान्न पर्याप्त थियो। 

२०८१ असार मसान्तमा २० खर्ब ४१ अर्ब १० करोड बराबर रहेको कुल विदेशी विनिमय सञ्चिति २३.१ प्रतिशतले वृद्धि भई २०८२ वैशाख मसान्तमा २५ खर्ब १२ अर्ब ९५ करोड पुगेको छ ।