युनिकोड
विश्वकै सबैभन्दा ठूलो होटल तथा आतिथ्य कम्पनीहरूमध्ये एक मेरियट इन्टरनेशनलका अध्यक्ष डेभिड मेरियट नेपाल आउने भएका छन्।
उनी जेठ २४ गते नेपाल आइपुग्नेछन् भने २५ गते फर्किने कार्यक्रम तय भएको छ।
चौधरी ग्रुपअन्तर्गतको सीजी हस्पिटालिटीको निमन्त्रणामा डेभिड मेरियट काठमाडौं आउन लागेका हुन्।
सीजी हस्पिटालिटीसँग मेरियटको रणनीतिक साझेदारीसम्बन्धी हस्ताक्षर कार्यक्रममा सहभागी हुन उनी नेपाल आउन लागेका हुन्।
सीजी हस्पिटालिटीले काठमाडौंको ठमेलमा मेरियटअन्तर्गतको चर्चित ब्रान्ड द रिट्ज–कार्ल्टन होटल निर्माण गर्न लागेको छ।
चौधरी ग्रुपले हस्पिटालिटीमा लगानी बढाउँदै नयाँ होटल शृंखला ‘सीजी बाइ मेरियट’ सञ्चालन गरिरहेको छ।
सीजी हस्पिटालिटीका अधिकारीहरुले नेपालखबरलाई बताएअनुसार डेभिड जेठ २४ गते काठमाडौं आइपुग्नेछन्। सोही दिन सीजी हस्पिटालिटीले मेरियटसँग सहकार्यको सम्झौता गर्ने कार्यक्रम छ।
‘डेभिड मेरियट २४ गते दिउँसो काठमाडौं आइपुग्ने कार्यक्रम छ। साँझ होटल सोल्टीमा रणनीतिक साझेदारीसम्बन्धी हस्ताक्षर कार्यक्रम आयोजना गरेका छौँ’, सीजी हस्पिटालिटीका एक अधिकारीले भने।
सीजी हस्पिटालिटीले मेरियटअन्तर्गतको चर्चित ब्रान्ड द रिट्ज कार्ल्टन र वेस्टिन होटल्स एन्ड रिसोर्टसँग साझेदारीसम्बन्धी हस्ताक्षर गर्ने तयारी गरेको छ।
मेरियट इन्टरनेशनलको स्थापना सन् १९२७ मा भएको थियो। हाल यसका ९ हजार सात सयभन्दा बढी होटल तथा रिसोर्टहरू १४० भन्दा बढी देशमा सञ्चालनमा छन्।
प्रतिक्रिया