शुक्रबारबाट रिलिज हुने फिल्म ‘बहाव’ले बुधबार साँझ राजधानीमा प्रिमियर गरेको छ।
फिल्मकर्मी, सञ्चारकर्मी, पत्रकार र नेताहरुको उपस्थितिमा गरिएको प्रिमियरपछि फिल्मकर्मीसहितले विषय वस्तुपरक लागेको प्रतिक्रिया दिएका छन्।
एमाले नेता रघुजी पन्तले ‘बहाव’ नेपाली फिल्म जगतमा सम्भावना बोकेको फिल्म बनेको प्रतिक्रिया दिएका छन्।
‘फिल्मको विषयवस्तु नयाँ छ। नेपाली दर्शकका लागि यसले फरक स्वाद दिनेछ। फिल्मले हामीले समाजमा देख्दै र भोग्दै आएको विषयलाई गम्भीर किसिमले उठान गरेको छ’, उनले भने।
पूर्वस्वास्थ्य तथा जनसंख्या मन्त्री र सांसद पदम गिरीले फिल्मले समाजभित्रको अन्तरविरोधलाई देखाएको बताए।
उनले समाजको विभेदको जरा उखेल्न नसिरहेको अवस्थामा ‘बहाव’ ले त्यो जरा उखेल्न भूमिका निर्वाह गर्ने दाबी गरे।
‘यस्तो फिल्मले समाजलाई बदल्न महत्वपूर्ण भूमिका खेल्छ। फिल्मले समाजको वास्तविक कथा बोलेको छ’, उनले भने।
निर्देशक नरेश पौडेलले ‘बहाव’ नेपालमा बनिरहेका फिल्म भन्दा फरक शैलीमा बनेको बताए। उनले आफूले जापानी फिल्म हेरेको अनुभव गरेको खुलाए।
‘फिल्म हेरिरहँदा जापानी फिल्म हेरेको अनुभव गरें। कथावस्तु फरक भएकाले पनि मलाई हेर्न मजा लाग्या’, उनले भने।
कलाकार भोलाराज सापकोटाले कथादेखि प्रस्तुतीकरण, कलाकारको अभिनय राम्रो लागेको बताए।
अर्का कलाकार दीपक आचार्यले नेपाली परिवेशमा एउटा राम्रो फिल्म बनेको उल्लेख गरे। अर्का कलाकार विजय बरालले फिल्मको कन्सेप्ट आफूलाई मनपरेको बताए।
अभिनेत्री लुनिभा तुलाधरले फिल्मले आफ्नो कथा भनेजस्तो अनुभव गरेको बताइन्। उनले मानसिक स्वास्थ्यको विषयलाई उठान गरेकोमा आभार व्यक्त गर्दै यस्ता कथामा अझ फिल्म बन्नुपर्ने सुझाव दिइन्।
फिल्मका अभिनेता कमलमणि नेपालले फिल्ममा आफू कठोर देखिए पनि वास्तविक जीवनमा कमलो मनको भएको बताए। कोरोना महामारीको समयमा काम गरे पनि राम्रो सिर्जना दर्शकमाझ ल्याएको जनाए।
Shares
प्रतिक्रिया