युनिकोड
टर्कीमा हुने नेटो शिखर सम्मेलनको पूर्वसन्ध्यामा सोमबार रुसले युक्रेनको किएभ क्षेत्रमा ब्यालेस्टिक मिसाइल आक्रमण गर्दा कम्तीमा आठ जनाको मृत्यु भएको छ भने ३४ जना घाइते भएका छन्।
राजधानी किएभ र आसपासका क्षेत्रमा एक साताभित्र भएको यो दोस्रो ठुलो आक्रमणले युद्ध थप उग्र बन्दै गएको संकेत दिएको छ।
किएभ क्षेत्रीय सैन्य प्रशासनका प्रमुख तिमुर टाकाचेन्कोका अनुसार आक्रमणबाट चारवटा आवासीय भवनमा आगलागी भएको छ।
बुचा जिल्लामा सात जनाको र राजधानी क्षेत्रमा एक जनाको मृत्यु भएको उनले जानकारी दिए।
किएभका मेयर भिटाली क्लिट्स्कोले हवाई सुरक्षा प्रणाली सक्रिय पारिएको र सर्वसाधारणलाई सुरक्षित आश्रयस्थलमै बस्न आग्रह गरिएको बताए।
एएफपीका संवाददाताले सोमबार बिहान हवाई हमलाको चेतावनीपछि राजधानीमा लगातार १० भन्दा बढी विस्फोट सुनिएको बताएका छन्। उनका अनुसार केही समयपछि फेरि आकाशमा चम्किँदै थप विस्फोट भएको थियो।
यसैबिच मंगलबार टर्कीको अंकरामा सुरु हुने नेटो शिखर सम्मेलनका क्रममा अमेरिकाका राष्ट्रपति डोनाल्ड ट्रम्प र युक्रेनका राष्ट्रपति भोलोदिमर जेलेन्स्कीबिच युद्धबारे छलफल हुने अपेक्षा गरिएको छ।
त्यसपछि ट्रम्पले शान्ति प्रयासलाई पुनर्जीवित गर्ने उद्देश्यले रुसका राष्ट्रपति भ्लादिमिर पुटिनसँग पनि वार्ता गर्ने योजना रहेको ह्वाइट हाउसले जनाएको छ।
यता युक्रेनले पनि पछिल्ला हप्ताहरूमा रुसभित्रका ऊर्जा पूर्वाधारमा आक्रमण तीव्र बनाएको छ। रुसद्वारा नियन्त्रित क्रिमियाको सेवास्तोपोल नजिकै युक्रेनी आक्रमणपछि केही समय विद्युत् आपूर्ति अवरुद्ध भएको स्थानीय अधिकारीहरूले बताएका छन्।
मस्कोका मेयर सर्गेइ सोब्यानिनका अनुसार राजधानीतर्फ आएका युक्रेनी ड्रोनहरू रुसी हवाई सुरक्षाले खसालेको छ। युद्धको मैदानमा पनि तनाव कायम छ।
राष्ट्रपति जेलेन्स्कीले रणनीतिक महत्त्वको पूर्वी सहर कोस्ट्यान्टिनिभ्काका लागि लडाइँ जारी रहेको बताउँदै उक्त सहर आफ्नो नियन्त्रणमा रहेको रुसको दाबीलाई अस्वीकार गरेका छन्।
उनले नेटो शिखर सम्मेलनअघि मस्कोले थप ठुलो आक्रमणको तयारी गरिरहेको चेतावनीसमेत दिएका छन्।
शनिबार अमेरिकी स्वतन्त्रताको २५०औँ वार्षिकोत्सवका अवसरमा राष्ट्रपति ट्रम्पले पुटिन र जेलेन्स्कीसँग छुट्टाछुट्टै टेलिफोन संवाद गरेका थिए।
प्रतिक्रिया