लुम्बिनी प्रदेशमा आज राष्ट्रियसभा सदस्य उपनिर्वाचन हुँदैछ।
बुधबार बिहान १० बदेदेखि दिउँसो ३ बजेसम्म घोराहीको कर्मचारी मिलन केन्द्रमा राष्ट्रिय सभा उपनिर्वाचनको लागि मतदान हुने प्रदेश निर्वाचन कार्यालयका सूचना अधिकारी गेहन्द्र कुँवरले जानकारी दिए।
निर्वाचनमा सत्तारूढ दल नेकपा एमाले, नागरिक उन्मुक्ति पार्टी र प्रमुख प्रतिपक्षी नेपाली कांग्रेसबाट गरी तीन जना उम्मेदवारहरू आज हुने चुनावी प्रतिस्पर्धामा छन्।
उपनिर्वाचनको लागि सत्तारूढ एमालेबाट रोल्पाका कुमार दसौदी, कांग्रेसबाट रोल्पाकै माधवप्रसाद आचार्य र नागरिक उन्मुक्ति पार्टीबाट बाँकेका राजेन्द्रवीर राय मैदानमा छन्।
एमालेले नागरिक उन्मुक्ति पार्टीलाई आफूतिर तान्ने प्रयास गरेको छ।
नागरिक उन्मुक्ति सरकारलाई समर्थन गरेको दल हो। तर सत्तारुढ एमालेकै उम्मेद्वारसँग प्रतिस्पर्धामा उत्रिएको छ।
उपनिर्वाचनको अघिल्लो दिन (मंगलबार) पनि एमालेले नागरिक उन्मुक्तिसँग छलफल गरि आफूसँग तान्ने प्रयास गरेको थियो।
नागरिक उन्मुक्तिका प्रदेश सांसद राजकुमार चौधरीले केन्द्रमा कुरा भइरहेको र सहमति भएमा आफ्नो पार्टीका राजेन्द्रवीरको उम्मेद्वारी निस्कृय पनि हुन सक्ने बताएका थिए।
तत्कालीन एमाले सांसद खिमलाल भट्टराईले राजीनामा दिए पछि उक्त प्रदेशबाट प्रतिनिधित्व गर्ने राष्ट्रियसभा सदस्य पद रिक्त हुन पुगेको थियो। सोही रिक्त पदमा आज निर्वाचन हुन लागेको हो।
दुई वटा मतदान केन्द्र बनाइएकोमा क केन्द्रमा प्रदेश सांसदहरु र ख केन्द्रमा पालिकाका प्रमुख र उपप्रमुखले मतदान गर्ने कुँवरले बताए।
लुम्बिनी प्रदेशमा कुल मतदाता संख्या ३०५ जना छन्। जसमध्ये प्रदेश सांसदको संख्या ८७ र पालिका प्रमुख तथा उपप्रमुख मतदाताको संख्या २१८ जना रहेको निर्वाचन कार्यालयले जनाएको छ।
प्रदेशसभा सदस्य एक जनाको मतभार ४८ र स्थानीय तहका प्रमुख उपप्रमुखमध्ये हरेकको मतभार १८ हुने गर्छ।
मतदान सकिएको आधा घण्टाभित्र मतगणना सुरु हुने र गणना सुरु भएको डेढ घण्टाभित्रै नतिजा आउने सूचना अधिकारी कुँवरले बताए।
Shares
प्रतिक्रिया