त्रुटिपूर्ण संकेतका कारण एमटीआरको सेवा केहीबेर अवरुद्ध

त्रुटिपूर्ण संकेतका कारण सोमबार बिहान मास ट्रान्जिट रेलवे (एमटीआर)को एयरपोर्ट एक्सप्रेस र तुङचुङ लाइन सेवा लगभग १५ मिनेट अवरुद्ध हुन पुग्यो।

एमटीआरले बिहान ११ः३५ बजे सिंगनलिङ फल्ट (सांकेतिक त्रुटि) भएको घोषणा गरेको स्थानीय सञ्चारमाध्यमले उल्लेख गरेका छन्।

त्रुटिका कारण लाइकिङ र नाम चेओङ स्टेसनबाट तुङचुङतर्फ जाने लाइन ट्रेन र चिङ यि र काउलुन स्टेसनबाट पास हुने एयरपोर्ट एक्सप्रेस प्रभावित भएका थिए।

जसका कारण हङकङ र एसियावर्ल्ड-एक्स्पो स्टेसनबाट एयरपोर्ट एक्सप्रेसका रेल तथा हङकङ र तुङचुङ स्टेसनबाट पास हुने तुङचुङ लाइन ट्रेनका सेवा ८ देखि १० मिनेट ढिलो भएका थिए।

रेलसेवाको गडबडीसँगै हङकङ स्टेसनमा इन-टाउन चेक-इन सेवाको समयसीमा निर्धारित ९० मिनेटबाट बढाएर १२० मिनेट पुर्‍याइएको थियो।

करिब ११ः५० बजे एमटीआरले समस्या समाधान भएको घोषणा गरेसँगै प्रभावित सबै सेवा यथास्थितिमा फर्किएका थिए।