हङकङमा बसको ठक्करबाट पैदलयात्रुको मृत्यु, चालक पक्राउ

हङकङमा मिनीबसको ठक्करबाट ८२ वर्षीय पैदलयात्रुको मृत्यु भएको छ। प्रहरीले जनाएअनुसार सोमबार साँझ ६:४५ बजे फोतानको सुईओ रोड र लाईओ लेनको चोकमा सडक पार गरिरहेका वृद्धलाई मिनीबसले ठक्कर दिएको थियो।

टाउकोमा चोट लागेका पैदलयात्रीलाई सातिनस्थित प्रिन्स अफ वेल्स अस्पताल लगिएको थियो जहाँ उनलाई राति ९:०८ बजे मृत घोषित गरियो।

बसका चालकले लागू औषध सेवन गरी सवारी चलाएको फेला परेको छ। उनी लागू पदार्थ परीक्षणमा ‘फेल’ भएका हुन्।

६९ वर्षीय चालकलाई लागूऔषध सेवन र खतरनाक तरिकाले गाडी चलाएको आरोपमा पक्राउ गरिएको प्रहरीले जनाएको छ।

आरोपितलाई नियन्त्रणमा लिई प्रहरीले अनुसन्धान अघि बढाएको छ।

हङकङमा खतरनाक ड्राइभिङमा दोषी ठहरिएकालाई अधिकतम १० वर्ष जेल र हङकङ डलर ५० हजार जरिवाना हुन सक्ने कानुनी प्रावधान छ।

त्यस्तै, लागूपदार्थ सेवन गरी गाडी चलाएको प्रमाणित भएमा अधिकतम तीन वर्ष जेल र हङकङ डलर २५ हजार जरिवाना हुन सक्छ। (एससीएमपी)