एसियन खेलकुदको छनोटबाटै बाहिरियो हङकङको महिला क्रिकेट टोली

हङकङको महिला क्रिकेट टोली अर्को वर्ष जापानमा हुने एसियन खेलकुदको छनोटबाटै बाहिरिएको छ। 

मलेसियामा जारी एसियन गेम्स महिला छनोटमा हङकङको टोली जितविहीन भएर फर्कन लागेको हो।

छनोटको समूह ए मा रहेको हङकङले पहिलो खेलमा थाइल्यान्डसँग ८९ रनले पराजित भएको थियो। दोस्रो खेलमा बिहिबार घरेलु टोली मलेसियासँग ३४ रनले पराजित भएपछि समूह चरणबाटै बाहिरिएको हो।

अंकविहीन हङकङ समूह ए को पुछारमा रह्यो। हङकङ रहेको समूह ए बाट घरेलु टोली मलेसिया र थाइल्यान्ड सेमिफाइनलमा पुगेका छन्।

समूह बी बाट नेपाल समूह विजेता र चाइनाको महिला टोली उपविजेताको रूपमा सेमिफाइनलमा प्रवेश गरेका छन्। इन्डोनेसिया भने जितविहीन रूपमा बाहिरिएको छ।
 
सेमिफाइनलमा पराजित हुने टोलीले तेस्रो स्थानका लागि खेल्नेछन्। छनोटबाट फाइनल पुग्ने दुई र तेस्रो हुने टोलीले एसियन गेम्स २०२६ मा स्थान बनाउनेछन्।