युनिकोड
नेपाली कांग्रेसको संस्थापन इतर समूहनिकट विद्यार्थीहरुले नेपाल विद्यार्थी संघ (नेविसंघ) को नेतृत्वले एक पक्षीय रुपमा जिल्ला कार्यसमिति गठन गरेको भन्दै आपत्ति जनाएको छ।
इतर समूहनिकट विदार्थीहरुको मंगलबार नेपाल ल क्याम्पसमा सम्पन्न भेलाले अध्यक्ष दुजाङ शेर्पाले एक पक्षीय जिल्ला कार्यसमिति बनाइरहेको भन्दै आपत्ति जनाएको हो।
‘नेविसंघको विधान २०२७ को सातौं संशोधन को धारा ३१, २४ र २०७८ फागुन ३ गतेको नेपाली कांग्रेस कार्यसम्पादन समितिको निर्णयको समेत प्रतिकूल हुने गरी विभिन्न जिल्ला कमिटीहरु र क्याम्पस कमिटीहरुमा एक्पक्षीय र गुटगत रुपमा गठन गरिएका नियुक्तिहरु पूर्णतथा विधान विपरित भएकाले तत्काल नियुक्ति बदर गर्न र सो स्थानहरुमा विधिवत् रुपमा प्रतिनिधि खटाई अधिवेशनको वातावरण तयार गर्न ध्यानाकर्षण गर्दछौँ,’ भेलापछि विज्ञप्तिमा भनिएको छ।
इतर समूह निकट विद्यार्थीहरुले विधि–विधानविपरीत गरिएका कुनै पनि नियुक्तिहरुलाई मान्यता नदिन र पदमा रहेका विद्यार्थी नेताहरुलाई पनि भ्रममा नपर्न आग्रह पनि गरेका छन्।
उनीहरुले १ जना केन्द्रीय अध्यक्षको भरमा स्ववियु निर्वाचनमा नेविसंघले अपेक्षित परिणाम निकाल्न नसक्ने भन्दै पार्टी नेतृत्वसँग नेविसंघलाई पूर्णता दिन पनि माग गरेका छन्।
‘चैत ५ गते त्रिविले स्ववियु निर्वाचन गर्न तयारी गरिरहेको छ। तर, हालसम्म पनि नेपाली कांग्रेस पार्टी नेतृत्वको गैरजिम्मेवारीका कारण नेविसंघ १ जना व्यक्तिमा सीमित गरिनुले स्ववियु निर्वाचनमा नेविसंघले अपेक्षित परिणाम निकाल्न कठिनाइ हुने कुरामा हामी चिन्तित छौँ,’ विज्ञप्तिमा भनिएको छ, ‘तत्काल नेपाल विद्यार्थी संघको वैधानिक पूर्णताका लागि हामी पार्टी नेतृत्वलाई गम्भीर ध्यानाकर्षण गराउँदै संघको वैधानिक पूर्णताको माग समेत गर्दछौँ।’
प्रतिक्रिया