कांग्रेस बैठकमा गगनको प्रस्ताव : भातृ संगठनको महाधिवेशन ६ महिनाभित्र, भदौ १५ भित्र पूर्णता

‘भातृ संगठनले प्रत्येक तीन/तीन महिनामा कार्यप्रगति प्रतिवेदन बुझाउनुपर्ने’

नेपाली कांग्रेसका महामन्त्री गगन कुमार थापाले नेपाल विद्यार्थी संघ (नेविसंघ) लगायतका संगठनहरूलाई ६ महिनाभित्र महाधिवेशन सम्पन्न गर्ने जिम्मेवारीसहित भदौ १५ गतेभित्र पूर्णता दिनुपर्ने प्रस्ताव गरेका छन्।

मंगलबार पार्टीको केन्द्रीय कार्यसमिति बैठकमा सांगठनिक प्रस्ताव पेस गर्दै उनले तदर्थ समितिहरूको पनि पूर्णता दिनुपर्ने बताएका छन्। म्याद सकिएर तदर्थ समिति गठन भएका ६ वटा भातृ संगठनको पूर्णता भर्दाै १५ भित्र हुनुपर्ने प्रस्ताव थापाले बैठकमा राखेका छन्।

नेपाल प्रजातन्त्र सेनानी संघ, नेपाल भूतपूर्व सैनिक संघ, राष्ट्रिय लोकतान्त्रिक अपाङ्ग संघ, नेपाल मुस्लिम संघ, नेपाल ठाकुर संघ र नेपाल दलित संघको पूर्णता भर्दा १५ भित्र हुनुपर्ने उनले बताएका हुन्।

‘सबै भातृ संस्थाहरु जसको म्याद सकिएर तदर्थ समिति गठन गर्यौं तर त्यसले पूर्णता पाएको छैन,’ बैठकमा थापाले भनेका छन्, ‘नेविसंघ लगायतका संगठनहरुलाई ६ महिनाभित्र केन्द्रीय महाधिवेशन सम्पन्न गर्ने जिम्मेवारीसहित भदौ १५ सम्म पूर्णता दिने।’

सबै भातृ संगठनले आफ्नो कार्यप्रगति भदौ मसान्तसम्म पेस गर्ने र ३÷३ महिनामा कार्यप्रगति प्रतिवेदन पेस गर्ने पनि उनले बैठकमा प्रतिवेदनमार्फत बताएका छन्।