युनिकोड
पूर्वप्रधानमन्त्रीसमेत रहेका पार्टी अध्यक्ष केपी शर्मा ओली गिरफ्तार गरिएको विरोधमा नेकपा एमालेका जनसंगठनहरूले आज (शनिबार) काठमाडौँको माइतीघरमा प्रदर्शन गर्ने भएको छ।
नेकपा एमालेका सचिव महेश बस्नेतले अहिले दिउँसो ३ बजे माइतीघरमा जनसंगठनहरूका तर्फबाट विरोध प्रदर्शन गरिने जानकारी दिएका हुन्।
उनले भनेका छन्, ‘लोकतन्त्र, विधिको शासन र न्यायको पक्षमा उभिन सबैलाई सहभागिताका लागि हार्दिक आह्वान गर्दछु।’
जेनजी आन्दोलनमा हिंसात्मक दमन गरेको अभियोगमा तत्कालीन प्रधानमन्त्री ओलीलाई आज बिहानै भक्तपुरको गुन्डुस्थित निवासबाटै पक्राउ गरिएको हो। जिल्ला प्रहरी परिसर काठमाडौँ लगिएपछि स्वास्थ्य परीक्षणका लागि टिचिङ अस्पतालमा लगिएका उनलाई त्यहीँ भर्ना गरिएको छ।
डाक्टरले निगरानीमा राख्नुपर्छ भनेकाले पूर्वप्रधानमन्त्री ओलीलाई अस्पतालमै भर्ना गरिएको काठमाडौँ प्रहरी परिसरका प्रवक्ता, एसपी पवनकुमार भट्टराईले बताए।
ओली पक्राउ परेपछि शनिबार बिहान बसेको एमाले सचिवालय बैठकले यसविरुद्ध कानुनी र राजनीतिक कदम चाल्ने निर्णय गरेको छ।
प्रतिक्रिया